Admissiun a l'examen da teoria

En il chantun Grischun vegnan ils examens da teoria fatgs tenor il princip dad «open door». Als lieus dals examens da teoria pudais Vus cumparair senza preannunzia e far l'examen entaifer las uras d'examen inditgadas. Per che Vus vegnias admess a l'examen, duvrais Vus ina conferma d'admissiun persunala sco er in document d'identitad (carta d'identitad, passaport, permissiun per persunas estras). La conferma d'admissiun survegnis Vus paucs dis suenter che Vus avais inoltrà la dumonda per in permiss per emprender a manischar.

Lieus ed uras dals examens

Ina glista dals lieus e da las uras dals examens da teoria en il chantun Grischun chattais Vus sut ils suandants links.

Resguardai per plaschair ch'ils examens da teoria OAMan (Ordinaziun davart l'admissiun per il transport da persunas e da rauba sin via per manischunzs professiunals da las categorias C, C1, D e D1) vegnan purschids mo a Cuira ed a Samedan ed ad uras d'examen separadas.

Lieus ed uras dals examens da teoria en il Grischun

Lieus ed uras dals examens da teoria OAMan en il Grischun

Infurmaziuns impurtantas

Ils examens da teoria vegnan fatgs sin in tablet. Tut ils examens da teoria pudais Vus far en tudestg, talian u franzos. La teoria da basa (auto/moto) sco er l'examen da teoria da bartga purschain nus er en englais.

Sche Vus guardais la demo d'in examen da teoria en l'internet, survegnis Vus ina invista dal decurs d'in examen da teoria tar l'Uffizi per il traffic sin via.

Meds d'emprender sco er infurmaziuns impurtantas per sa preparar per l'examen da teoria e davart las categorias d'examens chattais Vus sut ils suandants links.

Demo d'in examen

Meds d'emprender

Indicaziuns davart las dumondas da teoria da las differentas categorias (dumber da dumondas, dumber da sbagls permess, e.u.v.)

Dumondas e respostas

Stoss jau fixar in termin per l'examen da teoria?

Per l'examen da teoria n'èsi betg necessari da fixar in termin. Vus duvrais mo ina conferma da l'admissiun a l'examen sco er ina cumprova d'identitad (passaport, carta d'identitad, permissiun per persunas estras). Las uras da l'examen da teoria chattais Vus en l'internet (guardar ils links survart a sanestra sin la pagina) u cun far in scan dal code QR sin Vossa conferma d'admissiun.

A partir da tge vegliadetgna poss jau far l'examen da teoria?

L'examen da teoria po vegnir fatg il pli baud 1 mais avant ch'ins cuntanscha la vegliadetgna minimala necessaria per la categoria respectiva. Definiziuns da las categorias sco er la vegliadetgna minimala per quellas chattais Vus sut il suandant link.

Reussì l'examen da teoria, e lura?

Suenter avair reussì l'examen da teoria da basa survegnis Vus per posta Voss permiss per emprender a manischar.

Excepziuns:

Categoria G ed M

Il permiss da manischar survegnis Vus directamain per posta, uschespert che Vus avais reussì ils examens da teoria e cuntanschì la vegliadetgna minimala.

Categorias professiunalas C, C1, D, D1 e TPP 121

Suenter l'annunzia avais Vus gia survegnì il permiss per emprender a manischar u Vus na duvrais nagin permiss per emprender a manischar, perquai che Vus avais gia in permiss da manischar che permetta da manischar il vehichel respectiv.