Attest d'assicuranza electronic

In vehichel na dastga betg vegnir mess en circulaziun sin vias publicas senza assicuranza da responsabladad. L'assicuranza cuvra la responsabladad da la possessura u dal possessur dal vehichel sco er da las persunas, per las qualas ella u el è responsabel tenor lescha – almain en quels stadis, nua ch'il numer d'immatriculaziun svizzer vala sco attest d'assicuranza.

In attest d'assicuranza electronic è obligatoric per tut ils vehichels a motor sco er per tut ils chars annexs che servan al transport da persunas e da rauba privlusa. L'attest d'assicuranza electronic è il mussament che Vus sajas assicurà en la dimensiun necessaria tar ina societad d'assicuranza cunter las ristgas da responsabladad.

Displaschaivlamain na dastgain nus betg acceptar attests d'assicuranza, sche la data dal cumenzament da lur valaivladad è pli veglia che 30 dis il mument da l'immatriculaziun.

L'attest d'assicuranza sto esser emess sin il num da la possessura u dal possessur dal vehichel. En il document dal vehichel sto vegnir inscritta la medema persuna sco sin l'attest d'assicuranza electronic.

Immatricular in vehichel

Sche Vus vulessas immatricular in vehichel en il chantun Grischun, pudais Vus far quai per posta u a noss spurtegl.

Per quest intent duvrain nus ils suandants documents:

• In attest d'assicuranza electronic che Vus survegnis da Vossa societad d'assicuranza.

• Sche Vus vulais immatricular dus vehichels per il medem numer d'immatriculaziun (numer transferibel), dovri dus attests d'assicuranza electronics.

• Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà da la garascha, cur che Vus cumprais il vehichel.

• En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.

• Sche Vus immatriculais per l'emprima giada in vehichel, stuais Vus er anc preschentar ina quittanza dals documents deponids da la controlla d'abitantas e d'abitants. Firmas ston preschentar in extract dal register da commerzi.

Midada da vehichel (remplazzar il vehichel)

Vulais Vus immatricular in auter vehichel empè da quel che Vus avais gì fin ussa?

En quest cas duvrain nus ils suandants documents:

• In attest d'assicuranza electronic che Vus survegnis da Vossa societad d'assicuranza.

• Sche Vus vulais immatricular dus vehichels per il medem numer d'immatriculaziun (numer transferibel), dovri dus attests d'assicuranza electronics.

• Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà, cur che Vus cumprais il vehichel.

• En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.

• Il document dal vehichel immatriculà fin ussa per annullar quel (sche quai n'è betg gia vegnì fatg).

Autorisaziun provisorica da circular

Tras questa autorisaziun po in vehichel circular avant ch'il nov document dal vehichel è emess.

Per pudair profitar da l'autorisaziun provisorica da circular, sto la possessura u il possessur dal vehichel disponer sco fin ussa d'agens numers d'immatriculaziun, d'in attest d'assicuranza valaivel sco er dals ulteriurs documents ch'èn necessaris per l'immatriculaziun. Ils documents cumplets ston vegnir tramess cun posta A a l'uffizi per il traffic sin via.

Da nov sto dentant vegnir emplenì ultra da quai in formular ch'ins sto avair cun sai en il vehichel, fin ch'il nov document dal vehichel è emess. Ina copia da quest formular sto vegnir tramessa a l'uffizi per il traffic sin via ensemen cun ils ulteriurs documents.

Decisiva per l'exmatriculaziun e per l'immatriculaziun è la data dal bul postal. L'autorisaziun provisorica da circular vala mo per viadis en Svizra e mo per vehichels che dastgan purtar ils medems numers d'immatriculaziun. Ella na vala betg per vehichels a motor ch'èn immatriculads provisoricamain u che vegnan utilisads cun in permiss dal di.

Numer d'immatriculaziun transferibel

Sche Vus vulais metter en circulaziun in segund vehichel cun il numer da Voss vehichel gia immatriculà (numer transferibel), duvrain nus ils suandants documents:

• In attest d'assicuranza electronic che Vus survegnis da Vossa societad d'assicuranza.

• Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà da la garascha, cur che Vus cumprais il vehichel.

• En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.

Resguardai per plaschair il suandant:
In numer transferibel po vegnir retratg mo per vehichels a motor tranter els u per chars annexs tranter els. Plinavant ston ils vehichels pudair circular cun numers d'immatriculaziun dal medem tip. Ina cumbinaziun da vehichels che ston per exempel avair numers alvs resp. numers verds n'è betg pussaivla.

Mintga vehichel che circulescha cun numers transferibels dovra in agen document dal vehichel.

Numers transferibels pon da princip vegnir concedids mo a maximalmain dus vehichels. In'excepziun vala per vehichels veterans (oldtimers), vehichels da lavur e per chars annexs.