Infurmaziuns tecnicas
Qua chattais Vus infurmaziuns impurtantas e respostas tar dumondas da la tecnica dal vehichel.
Midadas vi dals vehichels
Midadas tecnicas vi dal vehichel ston vegnir annunziadas. Nus stuain controllar vehichels midads, avant ch'els vegnan puspè duvrads. Nus recumandain a Vus d'As infurmar l'emprim, sche las midadas èn realisablas e quant ch'ellas custan.
L'Associaziun dals uffizis per il traffic sin via (asa) regla tut las midadas vi da vehichels a motor e vi da motos.
Vegnir annunziadas ston cunzunt las suandantas midadas:
- midada da la classificaziun dal vehichel
- midada da las dimensiuns, da las distanzas da las axas e da las rodas u dals pais
- intervenziuns che midan las emissiuns da svapurs u da canera
- indriz dal sbuf che n'è betg permess per il tip da vehichel
- midada vi da la transmissiun da forza
- rodas che n'èn betg permessas per il tip da vehichel
- midada vi dal guvernagl u vi dals frains
- montascha d'in indriz per trair chars annexs
- tut las autras midadas essenzialas
Laschar controllar las midadas tecnicas
Qua pudais Vus fixar in termin per ina controlla tecnica dal vehichel en in da noss lieus da staziunament.
Controllar l'indriz per trair chars annexs (rentagl)
Sche Vus montais in nov indriz per trair chars annexs vi da Voss vehichel, stuais laschar controllar il vehichel. Nus inscrivain la midada en il document dal vehichel. Pir lura dastgais Vus duvrar l'indriz per trair chars annex.
Per la controlla duvrais Vus tschertas datas dal vehichel. Latiers appartegnan la carta da circulaziun, l'uschenumnà Certificate of Conformity (certificat da concordanza da la Communitad europeica) u l'instrucziun da diever dal vehichel. Per montar e controllar l'indriz per trair chars annex recumandain nus da laschar gidar ina persuna dal fatg d'ina garascha.
Per laschar controllar la midada avais Vus las suandantas pussaivladads:
Excepziun: Per sistems da Variobloc e per sistems cumbinads per franar il char annex (pneumatics, electrics u idraulics) stuais Vus en mintga cas fixar cun nus in termin da controlla.
Midada da la paisa
Nus pudain midar il pais total admissibel d'in vehichel a motor u d'in char annex sin Vossa dumonda sco possessur u possessura dal vehichel. Questa midada è pussaivla maximalmain ina giada per onn. Ella è er permessa, sch'i mida la possessura u il possessur dal vehichel. La nova indicaziun dal pais na dastga betg surpassar la limita maximala garantida dal producent dal vehichel.
Formular per dumandar da midar il pais dal vehichel
Cumprar in vehichel d'occasiun
Sche Vus vulais cumprar in vehichel d'occasiun, resguardai per plaschair, ch'i na vala betg adina l'interval da controlla periodic en cas d'ina midada da la possessura u dal possessur. Vehichels dals suandants tips da vehichels pon vegnir immatriculads sin la nova possessura u sin il nov possessur, sche l'ultima controlla dal vehichel ha gì lieu avant main che 10 onns:
- motos
- vehichels a motor levs, vehichels a motor pitschens e vehichels a motor a trais rodas
- autos da persunas levs e grevs
- minibus
- autos da furniziun
- camiuns a sella cun in pais total fin 3,5 t
- rulottas a motor e vehichels cun ina carossaria endrizzada sco local
- chars annexs per il transport da chaussas cun in pais total fin 3,5 t
- chars a motor
- tractors
- vehichels a motor da lavur
- vehichels agriculs
- vehichels a motor d'in ischigl
- chars annexs da tut quests tips da vehichel sco er
- chars annexs da lavur, cun excepziun dals chars annexs dals pumpiers e da la protecziun civila