Tge vegn ad esser nov?
A partir dal 1. da schaner 2027 vegn la taglia sin il traffic stradal incassada tenor novas basas da calculaziun. L'adattaziun principala pertutga ils autos da persunas e las motos. Fin ussa vegniva la taglia calculada sin basa da la cilindrada. Questa metoda vegn remplazzada tras la calculaziun tenor il pais total e la prestaziun da norma. Per vehichels electrics ed ibrids plug-in datti al cumenzament ina cumpensaziun tecnica, quai pervia da lur pais pli grond e lur prestaziun da norma pli auta. Sin la basa ch'è vegnida calculada uschia, vegn alura concedida ina reducziun da 60 % per vehichels electrics resp. da 30 % per vehichels ibrids plug-in.
Quanta taglia da traffic stoss jau pajar per mes vehichel a partir dal 1. da schaner 2027?
Duvrai il tool online per calcular il nov import da taglia da traffic che Vus stuais pajar a partir dal 1. da schaner 2027.
Infurmaziuns impurtantas
Cura vegn tramess il quint da la taglia da traffic 2027?
Ils quints per las taglias sin il traffic stradal 2027 vegnan tramess – sco usità – la segunda mesadad dal november 2026.
Stoss jau pajar dapli u damain per mes vehichel?
Pervia dal nov sistem da calculaziun sto la gronda part da las possessuras e dals possessurs d'in vehichel pajar in auter import da taglia che fin ussa. Duvrai per plaschair il tool online per calcular l'import precis.
Tge vala per motos?
La taglia per motos vegn da nov calculada sin basa da la prestaziun da norma. Duvrai per plaschair il tool online per calcular l'import precis.
Autos electrics èn pli grevs – vegn quai resguardà?
Pervia da la tecnologia cun battarias resp. cellas da carburant èn ils autos electrics pli grevs. Plinavant han els ina prestaziun da norma pli auta. Per vehichels puramain electrics e per vehichels che funcziunan cun idrogen vegnan quests dischavantatgs cumpensads tras ina gulivaziun tecnica tar las basas da calculaziun.
Vegnan ils vehichels ibrids plug-in privilegiads?
Pervia da las battarias èn ils autos ibrids plug-in pli grevs. Plinavant han els ina prestaziun da norma pli auta. Per cumpensar quests dischavantatgs vegn concedida ina gulivaziun tecnica tar las basas da calculaziun.
Quanta taglia ston ins pajar per vehichels cun numers d'immatriculaziun transferibels?
Qua vala la medema regulaziun sco fin ussa. La taglia sin il traffic stradal per vehichels a motor cun numers d'immatriculaziun transferibels vegn incassada sin basa dal vehichel a motor ch'è suttamess a la taglia la pli auta. Per mintga ulteriur vehichel a motor vegn incassà in supplement da 20 pertschient da la taglia respectiva sin il traffic stradal.
Vala ina calculaziun speziala per la taglia da traffic per vehichels veterans?
En connex cun la taglia vegnan ils vehichels veterans tractads sco vehichels normals sin basa da lur admissiun respectiva. Quest tractament egual vegn er realisà cun las novas basas da calculaziun.