Victualias segiras da la stalla fin sin il plat – quai è la devisa da noss uffizi che vegn er exprimida en il num da noss uffizi: Uffizi per la segirezza da victualias e per la sanadad d'animals. Mo sche nus procurain per il bain da noss animals da niz, pon resultar da quai victualias segiras.

Perquai avain nus l'incumbensa da survegliar l'entira chadaina da victualias, davent da la producziun da las substanzas primaras fin al product che vegn vendì. Sche necessari stuain nus intervegnir e far correcturas per proteger las consumentas ed ils consuments uschè bain sco pussaivel da ristgas per la sanadad e d'engions en connex cun victualias. Betg sco ultim surpiglia noss uffizi ulteriuras incumbensas d'execuziun impurtantas, che sa refereschan al tema central «segirezza da victualias e sanadad d'animals» e che gidan a proteger las consumentas ed ils consuments. Latiers tutgan tranter auter l'execuziun da la legislaziun davart las substanzas chemicas, l'execuziun da la legislaziun davart la radioprotecziun concernent il radon sco er l'incassament da taglias sin bavrondas destilladas en il commerzi en detagl.

Noss post da servetsch occupa organs executivs cun diploms uffizials en il sectur da las epidemias d'animals, da la protecziun dals animals, dals medicaments veterinars, da la producziun primara e da las victualias. En noss laboratoris accreditads da l'analitica veterinara ed alimentara analiseschan las spezialistas ed ils spezialists da labor scolads spezialmain las emprovas.

Di per di stattan las collavuraturas ed ils collavuraturs da l'Uffizi per la segirezza da victualias e per la sanadad d'animals en stretg contact cun las burgaisas ed ils burgais, cun las possessuras ed ils possessurs da manaschis, cun las persunas suttamessas al dretg, cun las autoritads e cun las federaziuns dal chantun Grischun sco er da la Svizra, per tegnair quint da la devisa menziunada qua survart – victualias segiras da la stalla fin sin il plat! Nus As envidain da consultar ulteriuras infurmaziuns davart nossa lavur executiva sco er ils fegls d'infurmaziun, ils formulars e las publicaziuns sin la pagina d'internet da noss uffizi. Propostas per meglieraziuns pudais Vus gugent inoltrar ad info@alt.gr.ch.