Avais Vus gia chattà Voss «ocean blau»? Questa noziun stat en la blue-ocean-strategy per martgads e roms d'industria betg scuverts. Cun sviluppar Vossa idea commerziala e cun fundar Voss start-up u Vossa firma As sustegnain nus en moda multifara. Sco enconuschiders fundads dal Grischun sco lieu economic As gidain nus cun noss cussegls, intermediain contacts en nossa rait cumplessiva e S'avrin portas.
Fundar en il Grischun en in batterdegl
En ina fin duas emnas èsi fatg: interpresas sa laschan fundar en il Grischun svelt e nuncumplitgadamain – er online. Unica premissa: almain ina da las persunas autorisada da suttascriver sto viver en Svizra.
Noss agid da partenza
Nus enconuschain en il Grischun las cundiziuns generalas, il martgà da lavur ed il proceder il pli effizient per Voss project. Nus As colliain cun represchentants da l'economia ed intermediain contacts cun bancas spezialisadas, cun advocats u cun firmas da cussegliaziun e firmas fiduziaras. Nus ans legrain d'emprender ad enconuscher Voss project. Durant la realisaziun As sustegnain nus cun noss cussegl e sco avraportas.
Iniziativas grischunas per start-ups
Il Center da las IPM dal Grischun gida start-ups sco er interpresas pitschnas e mesaunas tar dumondas da l'economia da manaschi en connex cun la fundaziun d'ina interpresa – en spezial en ils secturs finanziaziun, management strategic, innovaziun ed internaziunalisaziun profitais Vus da differents servetschs da cussegliaziun ch'èn per part gratuits, sco er d'ina rait d'experts da la scienza, economia e furmaziun.
En il Tecnoparc dal Grischun a Landquart sa dattan start-ups ed interprendiders dal ti. En il center da fundaziun per interpresas da tecnologia discutan els ensemen, lavuran vi d'ideas novas u fan test cun l'applicaziun da prototips. Grazia a la commembranza dal tecnoparc en l'Allianza dals tecnoparcs profiteschan interpresas giuvnas d'ina rait economica ed academica excellenta.
The Incubator a Susch sa chatta sin 1440 m s.m. en vischinanza da las stailas. Quest incubatur grischun gida space-tec-start-ups a sa deterrar cun success. Conturns inspirants per lavurar en moda focussada e per sa barattar en moda creativa retschaivan interpresas giuvnas er en il Löwenberg – Surselva Impact Lab a Schluein.
Cun projects sco il InnoQube Swiss® a Cuira ed il InnHub a La Punt vegnan tiers en il proxim futur ulteriuras infrastructuras e servetschs d'auta qualitad ed engrondeschan la purschida en differentas regiuns geograficas dal Grischun.
La fundaziun grischuna INNOZET accumpogna interpresas grischunas giuvnas sin lur via a l'independenza. Ella las gida cun cussegls e presta sustegn finanzial en collavuraziun cun la Banca Chantunala Grischuna e cun la TRUMPF Svizra SA.
Start-ups qualifitgads pon er profitar da la promoziun finanziala dal chantun Grischun. Sut innovaziun e promoziun chattais Vus detagls davart ils instruments da promoziun.