Il Grischun porscha surfatschas industrialas d'en tut passa 300'000 m2, ch'èn bain situadas ed accessiblas excellentamain per cundiziuns attractivas per la domiciliaziun u l'expansiun d'interpresas orientadas a l'export. En quest connex stattan ils basegns d'interpresas d'auta tecnologia sco Life Sciences, Medtech, Biosciences, ICT, photonics, sensorica, automaziun, construcziun da maschinas e chemia en il center.
Access excellent al traffic internaziunal
Ils areals industrials ils pli impurtants dal Grischun sa chattan vi da l'axa da transit E43/A13 Minca/Stuttgart–Milaun ed èn colliads sur la E60/A3 er excellentamain cun ils spazis metropolitans Turitg e Basilea.
Disponibels en moda simpla e per cundiziuns flexiblas
Persunas cun domicil en Svizra u a l'exteriur han en il Grischun in access simpel e betg suttamess ad in'autorisaziun ad immobiglias e bains immobigliars da fatschenta. Per regla èsi pussaivel dals cumprar u dals survegnir en il dretg da construcziun.
Zonas d'industria per interpresas orientadas a l'export
- Domat: Il parc industrial Vial è la zona puramain d'industria la pli gronda dal Grischun. Per quest lieu è sa decidì ultimamain il concern american da tecnica medicinala Hamilton. Ulteriurs 150'000 m² da terren industrial averts excellentamain per il traffic cun via e viafier e cun ina infrastructura fitg buna èn pronts. Dapli infurmaziuns en il fegl d'infurmaziun davart il parc industrial Vial e cun ilgir virtual tras il parc industrial Vial.
- Zizers – Landquart: Colliaziuns directas cun l'autostrada e cun la viafier fan ch'il Tardisland è ina da las zonas d'industria las pli tschertgadas da la Svizra Sidorientala. Per interpresas d'industria e da servetsch innovativas stattan actualmain a disposiziun anc 35’000 m2 terren. Dapli infurmaziuns en il fegl d'infurmaziun davart il Tardisland e cun ilgir virtual tras il Tardisland.
- San Vittore: La zona d'industria da San Vittore sa chatta en la part italofona dal Grischun vi da l'autostrada E43/A13 curt avant Bellinzona, la chapitala dal Tessin. Ils pretschs dals bains immobigliars d'ina surfatscha da 19’000 m² anc disponibels en vischinanza da l'axa da transit dal Gottard E35/A2 Milaun–Turitg èn attractivs.
Dapli infurmaziuns en il fegl d'infurmaziun San Vittore e cun ilgir virtual tras San Vittore.
- Cuira: La chapitala chantunala porscha ad interpresas ed a lur collavuraturas e collavuraturs ina infrastructura urbana attractiva. Sin ils areals Pulvermühle e Sommerau stattan a disposiziun totalmain 22'400 m2 terren en il dretg da construcziun a cundiziuns attractivas. Dapli infurmaziuns en il fegl d'infurmaziun Cuira e cun ilgir virtual tras Cuira.
- Fideris – Jenaz Interpresas tecnologicas cun success internaziunal sco TRUMPF, Georg Fischer, WITTENSTEIN u GRITEC èn gia sa domiciliadas sin il prà verd en il Partenz. Ulteriurs 100'000 m2 terren tranter ils lieus da perscrutaziun Tavau e Landquart avran il spazi per innovaziuns d'interpresas. Dapli infurmaziuns en il fegl d'infurmaziun Fideris – Jenaz e cun ilgir virtual tras Fideris – Jenaz.
- Cazas: Situà directamain a l'axa da transit nord-sid E43/A13 è la zona d'industria Realta in punct da partenza ideal. En mo 15 minutas essas Vus en la chapitala chantunala Cuira. 68'000 m2 stattan a disposiziun en ina zona d'engrondiment che po vegnir activada en cas da projects attractivs.
Dapli infurmaziuns en il fegl d'infurmaziun Cazas e cun ilgir virtual tras Cazas.
Ulteriurs lieus, autras immobiglias ed objects da locaziun
En l'entir Grischun datti pliras ulteriuras zonas d'industria e da mastergn sco er immobiglias disponiblas. Nus As sustegnain tar Voss plans d'expansiun e tar la tschertga d'in lieu da domicil. N'hajas naginas retegnientschas d'ans contactar.