Innovaziuns dal Grischun han num LabElite I.D. Reader, Grivory G5V u Twinlevel Interface. Ellas èn motors decisivs dal success economic en il chantun il pli grond da la Svizra. La Confederaziun ed il chantun stgaffeschan cundiziuns generalas optimalas e promovan cun cleras finamiras products progressivs – cun gudogn per las interpresas e per il lieu.
Strategia d'innovaziun dal Grischun
Cun la Strategia d'innovaziun dal Grischun 2028 promova il chantun l'innovaziun en la perscrutaziun ed en l'industria. La Strategia d'innovaziun descriva, tge cundiziuns generalas, mesiras ed instruments duain vegnir creads per quest intent per cuntanscher – grazia a l'innovaziun – a media ed a lunga vista las finamiras chantunalas da la politica economica.
Il maletg da las finamiras da la Strategia d'innovaziun dal Grischun 2028 che la Regenza ha approvà descriva en moda exemplarica ils acturs principals da la Strategia d'innovaziun e da lur collavuraziun en ils suandants trais champs parzials:
- conturns d'innovaziun per l'economia privata cun las iniziativas chantunalas da la politica d'innovaziun
- lieu da perscrutaziun Tavau cun dus centers da perscrutaziun che han in caracter exemplaric, rinforzan la cuntrada da perscrutaziun ed occupan nischas cun success naziunal ed internaziunal
- center da scola auta integrà che ha in profil concepì a lunga vista e che unescha furmaziun sco er perscrutaziun applitgada en stretga colliaziun cun l'industria.
Promoziun da l'innovaziun en interpresas
Sin basa da las leschas concernent il svilup economic e las taglias po il chantun Grischun promover projects innovativs d'interpresas orientadas a l'export, tar las qualas i po vegnir fatg quint cun ina commerzialisaziun persistenta e ...
- tras las qualas naschan products u servetschs novs ed innovativs
- vegnan stgaffidas plazzas da lavur novas
- vegnan augmentadas la cumpetitivitad e la valurisaziun
- exista in martgà da vendita surregiunal per ils products
En quest connex sa basa il chantun Grischun sin ils suandants instruments da promoziun:
- contribuziuns finanzialas, emprests e garanzias
- levgiaments fiscals (en tschertas regiuns pussaivels sin la taglia chantunala, communala e federala)
L'Agentura naziunala per la promoziun da l'innovaziun Innosuisse metta a disposiziun meds da promoziun per projects d'innovaziun cuminaivels d'interpresas e d'instituziuns da perscrutaziun.
Promoziun da la transfurmaziun digitala
En il chantun Grischun è la promoziun activa da la transfurmaziun digitala francada en la lescha ed ella è vegnida messa en vigur da la Regenza per il 1. da schaner 2021. Dumondas davart ina promoziun finanziala da projects da digitalisaziun pon vegnir inoltradas a l'Uniun GRdigital cun in formular online. L'Uniun GRdigital examinescha e giuditgescha la dumonda e dat a la Regenza ina recumandaziun da promoziun.