Grazia a bunas cundiziuns generalas sa domicilieschan adina dapli interpresas en il Grischun ed expandeschan cun success. En branschas che sa basan sin la scienza è en quest connex l'access ad expertas ed experts in factur decisiv. En il Grischun sco metropola natirala chattan forzas da lavur dalunsch e damanaivel novas sfidas ed ina qualitad da viver extraordinaria.

Martgà da lavur liberal cun segirezza giuridica e stabilitad

Segirezza giuridica e stabilitad cumbinadas cun in pitschen dumber da regulaziuns ed ina birocrazia concisa fan ch'il Grischun è in lieu attractiv cun spazi per crescher. Il dretg da lavur svizzer liberal permetta a patruns ed a lavurants da fixar contracts da lavur per gronda part libramain. En intginas branschas reglan contracts collectivs u contracts normals da lavur la relaziun da lavur. Las assicuranzas socialas svizras porschan als lavurants ina vasta protecziun. Quai renda il Grischun attractiv tant per interpresas sco er per collavuraturs.

Dapi l'entrada en vigur da las cunvegnas bilateralas han forzas da lavur dal territori da la UE/AECL in access direct al martgà da lavur en il Grischun. Er burgais da terzs stadis pon vegnir recrutads cun l'admissiun correspundenta.

Scolas autas excellentas sco pools da talents

Passa 108'000 expertas ed experts futurs studegian en l'intschess d'ina distanza d'ina ura cun l'auto dal Grischun en Svizra ed en l'exteriur vischin. Sut Furmaziun e P&S vegnis Vus a savair dapli da quest pool da talents extraordinari.

Avantatg dal sistem da furmaziun dual

Ultra da la carriera en ina scola auta porscha il sistem da furmaziun dual vias da scolaziun directas che sa refereschan a la professiun ed a la pratica en ils secturs industria, artisanadi e servetschs. Ina furmaziun fundamentala professiunala intermediescha las abilitads, las enconuschientschas e las tenutas necessarias per exequir ina professiun. Dus terzs dals giuvenils en Svizra survegnan da la furmaziun fundamentala professiunala ina basa solida. Suenter la terminaziun da la furmaziun professiunala furman els la basa qualifitgada per ina purschida da forzas da lavur mundialmain excellenta.

Il trumf dal Grischun: l'auta qualitad da viver

En la concurrenza per forzas da lavur scoladas bain survegnan – ultra dal profil da la plazza da lavur e da las vistas da carriera – la purschida da temp liber e la qualitad da viver ina impurtanza adina pli gronda. Il Grischun sco metropola natirala cun sias purschidas e qualitads unicas influenzescha la decisiun a sia favur en moda decisiva. Vegni a savair dapli dal viver e dal lavurar en il Grischun.