Zum Seiteninhalt

Cumissiun federala dals monuments istorics

L'onn 1887 ha il cussegl federal surdà a la societad per il mantegniment da monuments d'art istorics, ch'era vegnida fundada in pèr onns avant, la funcziun da "cumissiun federala per la conservaziun da las antiquitads da la Svizra". Sut la designaziun actuala "cumissiun federala dals monuments istorics (CFMI)" è ella activa sco cumissiun spezialisada consultativa da la confederaziun per la tgira da monuments, per l'archeologia e per la protecziun dals maletgs dals lieus. Las commembras ed ils commembers sco er il presidi da questa cumissiun extraparlamentara vegnan elegids dal cussegl federal. Ultra da las incumbensas sin plaun federal fa la cumissiun – en cas spezials – expertisas davart dumondas da la tgira da monuments e da l'archeologia per mauns da las autoritads chantunalas. L'onn 2007 ha la CFMI edì ils "Princips per la tgira da monuments en Svizra", ina publicaziun davart ils princips en connex cun il patrimoni architectonic. La publicaziun na sa drizza betg mo a persunas spezialisadas, mabain er a patrunas e patruns da construcziun, ad architectas ed architects, a politicras e politichers sco er a persunas laicas interessadas.

 

Pagina d'internet da la CFMI

Princips per la tgira da monuments