Ensemen cun la Fundaziun da funtaunas da dretg da la Societad svizra dals giurists ha l'Archiv dal stadi lantschà vers la fin da l'onn 2018 in project da cataloghisaziun e d'ediziun "Protocols da las dietas e dals congress da las Trais Lias 1567–1797". Quests protocols da las dietas e dals congress da las Trais Lias èn ils precursurs dals protocols dal Cussegl grond e da la Regenza da pli tard. I sa tracta da l'inventari serial cumplet il pli impurtant davart l'istorgia grischuna dal temp modern tempriv. Cuntrari a las ediziuns dals ultims decennis, che pertutgavan singulas regiuns da las Trais Lias, vegn quest project a cumpigliar l'entira Republica inclusiv ils territoris subdits.

L'ediziun planisada è in novum en reguard metodic e tecnic. Uschia na vegn betg mo publitgada ina selecziun da funtaunas, mabain l'entir protocol duai vegnir preschentà dal tuttafatg en moda digitala. Actualmain vegn fatga l'avertura da basa; davart tut las sesidas vegn mintgamai preparada in'unitad da datas cun las tractandas. Il text original dal protocol respectiv ha in link tar in'unitad da datas davart la sesida.

Ils custs totals dal project importan circa 1,14 milliuns francs. Il chantun ha mess a disposiziun ina contribuziun da circa 750 000 francs. Tenor planisaziun dura il project fin l'onn 2026.

Communicaziun da la regenza dals 20 da december 2018 (gr.ch)

Website Fundaziun da funtaunas da dretg