A partir da sonda, ils 17 d'october 2020, vala en il chantun Grischun l'obligaziun da purtar ina mascrina en ils locals interns accessibels a la publicitad ed en tscherts secturs da las instituziuns da furmaziun. Sin proposta da l'Uffizi da sanadad ha la Regenza deliberà las mesiras correspundentas, per franar la derasaziun puspè rasanta dal nov coronavirus. Ultra da quai vala en ils manaschis da gastronomia in'obligaziun da seser. La Regenza appellescha a la disciplina da la populaziun e la supplitgescha instantamain d'observar las reglas da distanza e d'igiena.
A partir da sonda, ils 17 d'october 2020, a las 06.00, fin ils 15 da december 2020, a las 24.00, valan las suandantas mesiras:
En il chantun Grischun vala l'obligaziun da purtar ina mascrina en locals interns accessibels a la publicitad, en spezial en:
- affars, butias, fatschentas e negozis,
- centers da cumpra,
- uffizis postals,
- museums,
- teaters,
- edifizis da l'administraziun,
- baselgias e locals cuminaivels religius,
- kinos,
- staziuns (inclusiv perruns e sutpassadis)
- bibliotecas,
- hotels,
- manaschis da gastronomia (inclusiv en bars, clubs, discotecas e.u.v.).
Sco locals interns betg accessibels a la publicitad valan en spezial:
- instituziuns da la tgira d'uffants cumplementara a la famiglia,
- secturs da trenament d'instituziuns da sport e da fitness,
- bancas (halla da spurtegls e zonas d'autoservetsch).
Exceptads da l'obligaziun da purtar ina mascrina èn:
- uffants avant lur 12. anniversari e
- persunas che pon cumprovar ch'ellas na pon purtar nagina mascrina pervia da motivs spezials, en spezial pervia da motivs medicinals.
En manaschis da gastronomia (inclusiv hotels, bars, clubs, discotecas e.u.v.) na vala l'obligaziun da purtar ina mascrina betg per ils giasts che sesan vid ina maisa.
Da l'obligaziun da purtar ina mascrina en locals interns èn exceptadas las suandantas persunas:
- collavuraturas e collavuraturs e persunas che lavuran gratuitamain, sch'ina protecziun efficazia cunter ina infecziun vegn cuntanschida tras mesiras da protecziun spezialas, en spezial tras lastras da materia sintetica u da vaider senza averturas sin autezza dal chau,
- persunas performantas sco artistas ed artists u sportistas e sportists.
Las mesiras da protecziun vertentas en las instituziuns da furmaziun valan vinavant per tut ils stgalims da scola.
En las scolas popularas publicas e privatas (scolina, scola primara, scola reala e secundara ed instituziuns da la scola speziala) vala per tut las persunas creschidas in'obligaziun da purtar ina mascrina sin l'areal da scola, cun excepziun da las stanzas da scola. Sch'ina distanza dad 1,5 m tranter las persunas d'instrucziun e las scolaras e scolars na po betg vegnir observada durant l'instrucziun u sche barrieras fisicas (p.ex. plexiglas) n'èn betg avant maun, vala per las persunas d'instrucziun l'obligaziun da purtar ina mascrina. Scolaras e scolars èn exceptads da l'obligaziun da purtar ina mascrina. Ad ellas ed els èsi permess da purtar voluntarmain ina mascrina.
En las instituziuns da furmaziun dal stgalim secundar II (scolas professiu-nalas spezialisadas, centers da curs intermanaschials, lavuratoris d'em-prendissadi, soluziuns transitoricas, scolas medias), dal stgalim terziar, da la furmaziun supplementara ed en ils manaschis d'abitar e d'alimentaziun vala in'obligaziun da purtar ina mascrina sin l'areal da scola, cun excepziun da las stanzas da scola. En ils manaschis d'alimentaziun valan las reglas per manaschis da gastronomia. Sch'ina distanza dad 1,5 m na po betg vegnir observada durant l'instrucziun u sche barrieras fisicas (p.ex. plexi-glas) n'èn betg avant maun, vala l'obligaziun da purtar ina mascrina. Questas reglas valan er per il gimnasi inferiur.
Sur lur medias e medis d'instituziun pon instituziuns da la scolaziun speziala fixar – en cunvegnientscha cun la media chantunala resp. il medi chantunal – excepziuns motivadas da l'obligaziun da purtar ina mascrina.
Ulteriuras informaziuns: