Il portal da medias AV è vegnì endrizzà da l'uffizi da cultura, partiziun biblioteca chantunala dal Grischun, en il rom d'in punct central da svilup ch'è cuntegnì en il program da la regenza 2013-2016.
Avant quest project ha la biblioteca chantunala mess – en la collecziun ed en la cataloghisaziun da reticas – fin ussa il focus en emprima lingia sin publicaziuns, scrittiras e cudeschs. Cun il punct central da svilup 6/17 "Diversitad culturala e linguistica" èn vegnids approvads – en il rom dal program da la regenza 2013-2016 – meds finanzials supplementars cun l'intent da stgaffir infrastructuras (banca da datas e portal d'internet) per cataloghisar, render accessibels e segirar bains culturals audiovisuals e cun la finamira da prender suenter lavur.
En quai che reguarda l'archivaziun da bains culturals audiovisuals è la Svizra en ina rolla da piunier. Cun Memoriav, l'uniun per il mantegniment dals bains culturals audiovisuals da la Svizra, ha ella prestà lavur fundamentala essenziala per segirar, cataloghisar, intermediar ed entretschar medias audiovisualas (medias AV). La conservaziun e la tgira dal patrimoni e da la memoria culturala dal chantun Grischun na sa restrenscha betg mo sin las archivalias generalmain enconuschentas sco cudeschs e scrittiras, mabain cumpiglia er documents da film e da tun. Perquai che quests purtaders da datas èn periclitads pli e pli fitg en consequenza dal fatg ch'els sa laschan conservar mo limitadamain e perquai ch'igl è pli e pli difficil da chattar apparats da reproducziun che funcziuneschan, èsi stà inditgà da prender mesiras immediatas.
Questas mesiras han gì la finamira da registrar en in inventari central ils purtaders da films e da tuns d'ina relevanza istorica sco er da segirar ils documents tut tenor il grad da periclitaziun, d'als cataloghisar e da render accessiblas ad ina vasta publicitad las infurmaziuns respectivas en in catalog online che sa chatta sin in portal d'internet, e quai sco ulteriur servetsch da la biblioteca chantunala. Las materialias AV ch'èn accessiblas sur il portal da medias sviluppà da nov èn perditgas e regurdientschas impurtantas da l'istorgia e da la cultura grischuna. Il portal da medias AV na sa drizza betg mo ad ina vasta publicitad, mabain po er vegnir applitgà en ils secturs scola, furmaziun, scienza, perscrutaziun ed animaziun da museums.
Tar las lavurs da project vegnan las medias originalas emballadas da maniera che la conservaziun è garantida, e preparadas per in'archivaziun da lunga durada. En il rom dal project da medias AV èn vegnidas fatgas copias da numerusas medias che vegnan archivadas en la biblioteca chantunala dal Grischun.
Ils inventaris collectads e las infurmaziuns supplementaras derivan tant da museums, d'archivs culturals e d'instituziuns chantunalas sco er da bancas da datas online e da persunas privatas. Tut en tut han ins pudì dar access durant il project a passa 9000 exemplars da totalmain passa 6000 titels. Quests titels pon vegnir retschertgads sur il portal da medias AV. Las copias digitalas pon ins guardar u tadlar en la biblioteca chantunala a Cuira.
Impressum
Uffizi da cultura / biblioteca chantunala dal Grischun
Engraziament
A tut ils museums, a tut ils archivs culturals, a tut las instituziuns ed a tut las persunas privatas che han cooperà al project "Portal da medias AV". In engraziament spezial va al sustegn tras l'uniun Memoriav.
Copyright
29 da november 2016
Ils dretgs d'autur sin las medias digitalisadas èn tar la biblioteca chantunala dal Grischun. Ils dretgs d'utilisar las differentas medias AV èn tar ils auturs respectivs u tar las firmas da producziun correspundentas.