Tgi dastga eleger tar las elecziuns da la Regenza?

Eleger la Regenza pon tut las burgaisas svizras ed ils burgais svizzers che han cumplenì 18 onns, che abitan en il chantun Grischun e che n'èn betg sut curatella cumplessiva u na vegnan betg represchentads d'ina persuna incumbensada da prevenziun pervia d'ina inabilitad permanenta da giuditgar (art. 9 al. 1 e 2 CC).

Dastgan er persunas estras sa participar a las elecziuns da la Regenza?

Na. Sin plaun chantunal n'han persunas estras betg il dretg d'eleger. Er sche las persunas estras han il dretg da votar en lur vischnanca da domicil, na dastgan ellas betg sa participar a las elecziuns da la Regenza.

Han las Svizras ed il Svizzers a l'exteriur il dretg d'eleger la Regenza?

Gea, quest dretg han er las Svizras ed ils Svizzers a l'exteriur (guardar art. 3 al. 2 e 3 LDPC).

Co pon ins eleger las candidatas ed ils candidats e tge ston ins resguardar?

Per vuschar èsi da duvrar ils cedels electorals consegnads da la Chanzlia chantunala, che cuntegnan ils nums prestampads da las candidatas e dals candidats. La vusch vegn dada cun far ina crusch tar las candidatas ed ils candidats. Ina crusch po vegnir fatga tar maximalmain tschintg candidatas e candidats. Cedels electorals cun dapli che tschintg cruschs èn nunvalaivels (nov art. 34 al. 1bis LDPC). Las cruschs ston vegnir fatgas a maun. Cumular n'è betg permess.