Tge pretensiuns sto la proposta electorala ademplir?

La proposta electorala dastga cuntegnair maximalmain tschintg nums da persunas elegiblas e sto esser suttascritta persunalmain d'almain 20 persunas cun dretg da votar che han lur domicil politic en il chantun Grischun. Il formular da la proposta electorala sto vegnir inoltrà cun tut las indicaziuns pretendidas, pia incl. suttascripziun da la persuna proponida sco er indicaziuns e suttascripziuns da las sutsegnadras e dals sutsegnaders sco er da la represchentanza e da la substituziun da la proposta electorala. Sche la persuna proponida n'ha betg suttascrit la conferma, vegn stritgà il num (art. 19c al. 3 LDPC).

Èsi pussaivel da suttascriver dapli ch'ina proposta electorala?

Nagin na dastga suttascriver dapli ch'ina proposta electorala. Cas cuntrari vegn il num stritgà sin tut las propostas electoralas.

Tge indicaziuns davart las candidatas ed ils candidats èn d'inditgar sin la proposta electorala?

Las candidatas ed ils candidats ston inditgar lur num da famiglia e prenum uffizial, la data da naschientscha e l'adressa da domicil. Plinavant èsi pussaivel d'inditgar er il num, sut il qual ina persuna è enconuschenta sin plaun politic u en il mintgadi (p.ex. «Sep» empè da «Giusep» u in num d'allianza, p.ex. «Müller-Capaul»).

Tge funcziun han las represchentantas ed ils represchentants sco er las substitutas ed ils substituts d'ina proposta electorala?

Per la correspundenza cun las autoritads èsi d'inditgar – per mintga proposta electorala – ina persuna sco represchentanta u represchentant ed in'ulteriura persuna sco substituta u substitut da las sutsegnadras e dals sutsegnaders. Las represchentantas ed ils represchentants da las propostas electoralas sco er lur substitutas e substituts èn autorisads ed obligads da far – en num da las sutsegnadras e dals sutsegnaders ed en moda giuridicamain lianta – las decleraziuns necessarias per eliminar differenzas.

Tgi vala sco represchentanta u represchentant e sco substituta u substitut, sche questas persunas na vegnan betg inditgadas sin la proposta electorala?

Sch'i vegn desistì d'inditgar questas persunas, vala l'emprima sutsegnadra u l'emprim sutsegnader sco represchentanza e la segunda sutsegnadra u il segund sutsegnader sco substituziun.

Pon er las candidatas ed ils candidats ubain las persunas che presidieschan ina partida u che mainan las fatschentas da tala, esser represchentantas e represchentants u substitutas e substituts?

Gea. Er las candidatas ed ils candidats ubain las persunas che presidieschan ina partida u che mainan las fatschentas da tala, pon esser represchentantas e represchentants u substitutas e substituts.