Tgi po candidar per la Regenza?

Sa laschar eleger en la Regenza pon tut las burgaisas svizras ed ils burgais svizzers che han cumplenì 18 onns, che abitan en il chantun Grischun e che n'èn betg sut curatella cumplessiva u na vegnan betg represchentads d'ina persuna incumbensada da prevenziun pervia d'ina inabilitad permanenta da giuditgar (art. 9 al. 1 e 2 CC). Tgi ch'è vegnì elegì ina giada sco commembra u commember da la Regenza, dastga sa laschar reeleger duas giadas (art. 39 al. 3 CC).

Co pon ins sa laschar proponer sco candidata u candidat da la Regenza?

Per las elecziuns da la Regenza vala ina procedura d'annunzia. A l'elecziun vegnan admess mo candidatas e candidats proponids valaivlamain (art. 19a al. 1 e 2 LDPC). Per quest intent sto ina proposta electorala vegnir inoltrada sin palpiri a la Chanzlia chantunala, Reichsgasse 35, 7001 Cuira.

Fin il pli tard cura ston las propostas electoralas vegnir inoltradas?

Las propostas electoralas ston vegnir inoltradas fin il pli tard glindesdi, ils 13 d'avrigl 2026, a las 12.00, a la Chanzlia chantunala, Reichsgasse 35, 7001 Cuira. Valair vala il mument da l'entrada. La data dal bul postal na basta betg per observar il termin d'inoltraziun.

Fin cura po ina proposta electorala vegnir tratga enavos?

Retratgas da propostas electoralas ston esser arrivadas tar la Chanzlia chantunala, Reichsgasse 35, 7001 Cuira, fin il pli tard venderdi, ils 17 d'avrigl 2026, a las 12.00 (art. 19g al. 1 LDPC en cumbinaziun cun l'art. 21s ODPC). La data dal bul postal na basta betg per observar il termin d'inoltraziun. La persuna proponida sto dar ses consentiment en scrit a la retratga (art. 19g al. 2 LDPC).

Tge indicaziuns davart las candidatas ed ils candidats vegnan stampadas sin il cedel electoral per far ina crusch?

Il cedel electoral cuntegna, cun ina numeraziun cuntinuanta ed en successiun alfabetica, ils nums e prenums da las candidatas e dals candidats, e plinavant las ulteriuras indicaziuns davart las can-didatas ed ils candidats (annada, professiun, lieu da domicil ed eventualmain appartegnientscha ad ina partida u ad ina gruppaziun sco er – per candidatas e candidats ch'eran gia en uffizi – la remartga «fin ussa»). Davant mintga num hai in champ per far ina crusch. Las indicaziuns dastgan avair tut en tut maximalmain 80 segns (incl. spazis e segns d'interpuncziun). L'appartegnientscha ad ina partida vegn, en cas da basegn, er stampada sin il cedel electoral. Questa indicaziun na fa dentant betg part da la limitaziun da segns.

Pon er novas persunas candidar, sch'i dat in segund scrutini?

Novas candidaturas èn permessas, sch'i dat in segund scrutini (art. 19i al. 2 LDPC).