Navigation

Inhaltsbereich

«Sviluppar cuminaivlamain soluziuns pussaivlas»

Olivia Tognarelli e Donat Albin mainan il nov Post da cussegliaziun chantunal per victimas da discriminaziun rassistica. Els surpiglian ina responsabladad impurtanta per umans che dovran sco emprim surtut in visavi nunpartischant.

Illustration Lorena Paterlini
 

La tema da betg vegnir prendids serius è in dals pli impurtants motivs, pertge che umans discriminads rassisticamain na tschertgan nagin agid, maindir sa dostan per lur dignitad e lur dretgs. Vitiers vegn il quità ch'els pudessan anc pegiurar tut cun ina reacziun. Ina nova purschida gratuita dal Post spezialisà per l'integraziun vul midar quai. Olivia Tognarelli e Donat Albin (cf. ils purtrets) cusseglian dapi l'entschatta 2022 d'ina vart persunas u confamigliars che sa sentan discriminads sin fundament da lur colur da pel, lur origin, lur religiun u d'autras caracteristicas culturalas. E da l'autra vart instituziuns spezialisadas, ma era persunas ed organisaziuns che vegnan confruntadas en lur mintgadi cun dumondas da rassissem e discriminaziun. «La cifra inuffiziala è probablamain auta pervi da la tema da las persunas pertutgadas», di Felix Birchler, manader dal Post spezialisà per l'integraziun. «Nus na pudain perquai betg dir precisamain quant gronda che la dumonda vegn ad esser. Ma nus savain – era sin fundament da nossas experientschas da cussegliaziun da fin ussa – ch'igl exista er en il Grischun in basegn adina pli grond d'ina tala purschida». Las pretensiuns correspundentas exprimidas da la societad civila e da differents acturs dal sectur d'integraziun ils ultims onns sa cuvrian cun questa valitaziun. Il Departament da giustia, segirezza e sanadad ha perquai examinà differentas opziuns. El ha decis d'amplifitgar per quest intent las cumpetenzas dal Post spezialisà per l'integraziun ed ha approvà il 2021 il concept correspundent.

Render capabel empè d'intervegnir

«Il pli impurtant è che las persunas pertutgadas possian sa fidar d'avair in visavi bainvulent», declera Birchler. I dovra empatia, ma «Olivia e Donat ston era restar neutrals. Igl è da grond avantatg, sche las persunas savens agitadas survegnan in pau distanza ed ina meglra survista grazia al sustegn professiunal», declera il manader dal post. Pir en in segund pass giaja quai per tschertgar cuminaivlamain soluziuns. Per il solit han las persunas pertutgadas alura sezzas in'idea e daventan activas. Tognarelli ed Albin intervegnan mo, sch'ina persuna giavischa quai ed enconuscha las consequenzas pussaivlas. Per cas spezialmain pretensius u sche la neutralitad na po betg vegnir garantida, perquai che per exempel in'autra autoritad vegn accusada, exista per l'ulteriura elavuraziun ina cunvegna da prestaziun cun l'Organisaziun d'asil Turitg (AOZ), in'instituziun da dretg public independenta. «La cussegliadra ed il cussegliader vegnan scolads cuntinuadamain da Hanspeter Fent, confundatur dal Center da cumpetenza per conflicts interculturals TikK. Per sclerir cas giuridicamain relevants, per exempel, sch'igl è inditgà da far in'accusaziun, consulteschan Tognarelli ed Albin expertas ed experts da la Cumissiun federala cunter il rassissem u renvieschan ad advocatas ed advocats spezialisads per talas dumondas. «Per che era quest pass restia simpel e nunbirocratic, pudain nus surdar bons per cussegliaziuns giuridicas», explitgescha Birchler.

Daventar pli visibels

Ussa vali da far pli visibla la purschida cun mesiras da reclama specificas. Ins è persvas che la purschida vegn uschia nizzegiada adina dapli. «Independentamain da quai è mintga singul cas, nua che nus pudain gidar a meglierar u schliar la situaziun, in success», concluda Birchler. En accord cun il program chantunal d'integraziun vegn il Chantun a far in'emprima bilantscha la fin dal 2023.

Dapli infurmaziuns: rassismusberatung.gr.ch

 

Donat Albin – cussegliader dal Post da cussegliaziun cunter rassissem e responsabel per il sectur furmaziun e fatgs socials

«Gia en mia emprima plazza suenter il studi sun jau vegnì confruntà cun dumondas da discriminaziun en il center da transit a Mustér. Las experientschas persunalas tanschan dentant anc pli lunsch enavos: mia mamma è oriunda da la Germania e vala en il vitg, nua che jau sun creschì si, per part enfin oz sco «estra». Gia da mattatsch vegniva jau ‹vilà›, realisond quant dominants che pregiudizis pon esser e quant darar ch'els vegnan mess en dumonda. Sa sentir pertutgà persunalmain n'è dentant betg ina buna strategia per mias incumbensas actualas. Nus stuain esser empatics, ma neutrals. Per pudair far quai vegnin nus scolads cuntinuadamain. Jau emprov adina da ma metter en la situaziun da mes visavi, da prender serius la persuna pertutgada, ma da betg ma colliar emoziunalmain cun ella. Quai na gidass nagin. Era mantegnair ina tscherta distanza è in tema impurtant, la finala vegnin nus confruntads cun istorgias che fan fitg pertutgà. Jau ma legrel da crescher vinavant cun questas sfidas.»

Olivia Tognarelli – cussegliadra dal Post da cussegliaziun cunter rassissem e jobcoach per l'integraziun professiunala

«L'access al martgà d'abitaziuns è fitg limità, sch'ins sto cumbatter cunter pregiudizis. Questa furma concreta da discriminaziun hai jau observà memia savens en mia plazza oriunda, nua che jau intermediava abitaziuns a fugitivas e fugitivs renconuschids ed admess provisoricamain. Gia avant che studegiar pli tard lavur sociala hai jau damai realisà quant perseverant ch'il rassissem po esser en il mintgadi e tge vastas consequenzas ch'el po avair. Da quai po era mes um raquintar inquala chaussa. El deriva da São Paulo. Cun discriminaziun sin il martgà da lavur svizzer è el era gia sez vegnì confruntà. Sche emploiadas ed emploiads n'èn betg infurmads e n'enconuschan betg lur dretgs, vegnan els per part nizzegiads ora senza scrupels. Ina vart fitg interessanta da mia nova activitad da cussegliaziun vegn ad esser d'emprender da caracterisar adina dapli da questas fassettas da la discriminaziun rassistica e da pudair sustegnair uschia las victimas da rassissem a moda anc pli adequata.»

 

Text: Philipp Grünenfelder; illustraziun: Lorena Paterlini