Navigation

Inhaltsbereich

«In clima da lavur plain confidenza è enorm impurtant»

Patrik Oberholzer ed Urs Hardegger lavuran di per di cun umans da las pli differentas tempras, era cun fugitivs renconuschids e persunas admessas provisoricamain. Co procuran els che la discriminaziun rassistica na survegnia nagina plattafurma e co intervegnan els, sch'i dat tuttina ina giada in cas?

 

Intervistas: Philipp Grünenfelder

Patrik Oberholzer, manader da la furmaziun professiunala dals Servetschs psichiatrics Süd, Pfäfers «Metter sin maisa las chaussas»

Signur Oberholzer, ils manaschis dals Servetschs psichiatrics Süd porschan plazzas d'emprendissadi en otg differentas professiuns. È la cumposiziun dal team er uschè diversa?

Gea, tuttavia, nossas collavuraturas e noss collavuraturs èn uschè divers sco ils profils professiunals en la tgira, en il mantegniment da l'edifizi u en l'economia da chasa – betg mo tar las emprendistas ed ils emprendists. Blers vegnan dal Portugal, da Sri Lanka, da l'Eritrea u l'Italia ed han las pli differentas biografias sin fundament da lur experientschas da migraziun e da fugia. Quests umans portan resursas supplementaras, da las qualas nus pudain profitar. Per exempel enconuschientschas da las linguas.

Co reussescha la collavuraziun cun caracters uschè differents?

In clima da lavur plain confidenza è enorm impurtant. I sto esser pussaivel da metter sin maisa era chaussas malempernaivlas. Nus superiurs stuain esser mintga di in exempel per quest stil da communicaziun transparent ed empatic sin il medem nivel. In avantatg gist qua a Pfäfers è nossa organisaziun fitg famigliara. Il cuschinier auxiliar dat dal ti al CEO precis sco jau. Tgi che sa senta attaschà, è era pli tgunsch pront da sustegnair ils auters, independentamain danunder ch'el vegn.

Hai tuttina gia dà cas da discriminaziun rassistica?

Dals tredesch onns che jau lavur qua en la furmaziun professiunala na m'èn enconuschents per fortuna nagins cas concrets. Jau pens en mintga cas che las persunas pertutgadas fissan s'annunziadas resp. s'annunziassan. I na regia nagin clima da la tema ed en cas da basegn disponin nus tant d'in post da mediaziun intern sco era d'in post da mediaziun independent dal chantun da Son Gagl. En singuls cas poi dar che pazientas e pazients reageschan rassisticamain en situaziuns d'urgenza u situaziuns extremas. Tals scenaris fan part da la furmaziun da tgira e nus purschain da princip per tuttas eventualitads criticas models da sustegn tenor clers standards.

Quant enavant As tanghescha la tematica da discriminaziun era privat?

Ella m'occupa gia mo perquai ch'ella è omnipreschenta en la politica. En mes circul d'enconuschents vegn jau dentant bainduras era sensibilisà in ad in per las consequenzas negativas d'in tractament inegual. Per exempel tge ch'i signifitga per pèrs da la medema schlattaina en il mintgadi da betg avair ils medems dretgs. Per fortuna va la «Lètg per tuts» en vigur il fanadur.

Urs Hardegger, manader d'instituziun da la Fundaziun am Rhein, Maiavilla – «Quai n'accept jau betg»

Signur Hardegger, tge rolla gioga la diversitad en ils dus centers da tgira ed en l'ospizi da la Fundaziun am Rhein?

Betg in'activa, ma tuttina in'impurtanta. Var 40 pertschient da nossas collavuraturas e noss collavuraturs han ina biografia da migraziun. Intgins vivan qua dapi decennis, ad auters purschain nus in access al mund da lavur ed a nossa societad. Nus profitain fitg da questa varietad, tranter auter perquai ch'ella crescha cuntinuadamain era tranter las attempadas ed ils attempads. Quels derivan per part era da l'Italia, dal Tibet u d'auters pajais ed apprezieschan da pudair discurrer cun lur visavi en la lingua materna u sche lur atgnadads culturalas vegnan chapidas.

Tuttina n'ha ina gronda part da Vossas collavuraturas e da Voss collavuraturs nagina biografia da migraziun. Avais Vus il sentiment ch'els As annunziassan cas da discriminaziun rassistica?

Jau di adina a mes cader ed a las collavuraturas ed als collavuraturs: pli gugent annunziar ina giada in cas memia bler che taschentar istorgias dischagreablas. Ina communicaziun averta gida a tschiffar ils problems vi da la ragisch. Ultra da quai ha il tractament egual da tut ils umans la pli auta prioritad per mai. Questa tenuta clera ha in effect preventiv. Jau sai che las persunas pertutgadas s'annunziassan. Quai è era gia vegnì avant ils ultims onns en dus, trais cas excepziunals, adina partind da cussadentas e cussadents attempads.

Pudais Vus far in exempel?

Sco emprim vuless jau accentuar che nus essan da princip preparads per differentas furmas d'abus pussaivels envers nossas collavuraturas e noss collavuraturs e savain co reagir en tals cas. Quai fa part dals standards da nossa branscha, en la quala nus vegnin confruntads cun situaziuns interumanas pretensiusas. Nus avain in post da mediaziun ed ina persuna da confidenza en chasa (manadra dal servetsch da tgira), als quals ins po sa drizzar en cas d'abus. Ulteriurs instruments èn tranter auter ils formulars da reclamaziun interns. Ed uss in exempel: ina cussadenta na vuleva per tut pretsch betg sa laschar servir d'ina collavuratura srilankaisa – pervi da la colur da sia pel. In tal cumportament n'accept jau betg, en nagin cas. Suenter che jau hai survegnì l'annunzia, hai jau immediat tschertgà il discurs cun la cussadenta e l'hai explitgà quai cler e net. In cas cumparegliabel avain nus gì avant intgins onns cun ina Svizra emigrada ch'era turnada en l'auta vegliadetgna da l'Africa dal Sid e vuleva viver qua tar nus vinavant tenor sia ideologia dal temp da l'apartheid ...

Co valitais Vus en general la situaziun en il sectur da la tgira?

Jau enconusch surtut la situaziun en las chasas da tgira ed hai il sentiment ch'i regia en il Grischun en general in clima positiv e solid. La finala fan ils temas discutads era part da la buna furmaziun da noss persunal da tgira.

Vus avais ina clera lingia – era sper la lavur?

Natiralmain. Tant en mes ambient privat sco era per mias activitads sco deputà en il Cussegl grond vala mes credo: davant Dieu èn tut ils umans eguals. E quai resguard jau senza excepziun.