Cun la publicaziun «Integraziun en il focus 2022» che cumpara ina giada l'onn dain nus mintgamai la primavaira in'invista en las incumbensas ed ils projects che occupan nus en il rom dal program chantunal d'integraziun. Mintga ediziun focussescha sin l'accent da l'onn actual dal Post spezialisà per l'integraziun. L'onn 2022 èn quai il rassissem e la discriminaziun.

Editorial Ilhan Mohamed Aden, interpreta interculturala

Chara lectura, char lectur

Per fortuna da Dieu n'hai jau persunalmain stuì far naginas experientschas rassisticas u discriminantas durant ils 26 onns che jau viv uss en Svizra. Ni en mes uffizi d'onur sco presidenta da l'Uniun somalaisa dal Grischun ni sco interpreta interculturala per Verdi, ni sco confundatura da l'Inscunter da dunnas Domat avant 20 onns ni en ina da numerusas autras instituziuns d'integraziun sco la Caritas. Jau sun fitg engraziaivla e ma sent sco part evidenta da la societad svizra.

Dal circul d'enconuschentas e d'enconuschents aud jau però adina puspè quant spert ch'ins po sa sentir exclusa u exclus. Tuttina, sche la discriminaziun succeda sapientivamain u sche quest sentiment è la summa da massa «pitschnas» experientschas dal mintgadi presumadamain «nunintenziunadas», ma la finala tuttina negativas. Da glieud giuvna che viva gia daditg qua u ch'è creschida si qua, che fa in emprendissadi e discurra tudestg svizzer sai jau per exempel quant seccant ed offendent ch'igl è d'adina puspè vegnir pledentada en la publicitad en in miserabel tudestg da scrittira u en englais – mo pervia da la cumparsa.

Jau benevent perquai fitg ch'il Post spezialisà per l'integraziun s'occupa conscientamain da tut las fassettas da questa tematica. I dovra l'engaschament da nus tuts, da mintgina e mintgin, d'uniuns, da scolas, da fatschentas ed apunto era da l'administraziun publica. Ensemen vegnin nus pli lunsch.

Editorial Felix Birchler, manader dal Post spezialisà per l'integraziun

Chara lectura, char lectur

Era jau hai fin oz gì la fortuna da betg stuair subir persunalmain rassissem e discriminaziun. Schegea che la fortuna gioga en mes cas ina pli pitschna rolla che tar Ilhan. Jau n'appartegn gea betg ad ina gruppa sociala cun commembers che ston far – ina giada, mintgatant u trasora – talas experientschas sin fundament d'ina diversitad presumada. I na dastga però era per ella en nagin cas esser chaussa da fortuna ch'ella mitscha d'exclusiun, degradaziun u schizunt rassissem cun violenza corporala. Quai sto sa chapir da sez.

Sco post spezialisà avain nus tschernì il tema rassissem e discriminaziun sco accent da l'onn, perquai che nus vulain lavurar activamain per cuntanscher questa finamira – era suenter quest onn. Nus faschain lavur da sensibilisaziun e da scleriment e sustegnain persunas pertutgadas cun noss Post da cussegliaziun per victimas da discriminaziun rassistica. Uschia gidain nus per incumbensa da la Regenza e cun nossa motivaziun persunala da transfurmar la fortuna en insatge che sa chapescha per tuttas e tuts.

Questa publicaziun dat a Vus in'emprima invista en questa lavur. Nus giavischain a Vus in'interessanta lectura.

Text: Philipp Grünenfelder