Cuntegn da la pagina

Directivas per promover l'integraziun da persunas estras en Grischun

Per sviluppar vinavant la politica d'integraziun chantunala è vegnida stgaffida ina nova basa: Per incumbensa da la regenza ha ina cumissiun d'integraziun sustegnida da differentas varts elavurà directivas per promover l'integraziun da persunas estras en il Grischun. Las directivas cuntegnan recumandaziuns per tut las acturas ed ils acturs ch'èn pertutgads da l'integraziun.

L'integraziun è ina incumbensa principala dal stadi e da la societad. La confederaziun, ils chantuns e las vischnancas ston stgaffir cuminaivlamain cundiziuns favuraivlas per l'egualitad da las schanzas e per la participaziun da la populaziun estra a la vita publica. Per la direcziun strategica da la promoziun da l'integraziun da persunas estras en il Grischun ha la regenza installà il mars 2010 ina cumissiun d'integraziun manada da Patricia Ganter, l'incumbensada chantunala d'integraziun. Represchentantas e represchentants da las vischnancas, da l'economia, da las baselgias chantunalas e cuminanzas religiusas, da federaziuns, uniuns ed organisaziuns sco er da la populaziun residenta estra han resumà las directivas per promover l'integraziun en in rapport. Questas directivas èn decisivas ils proxims onns per las activitads dal chantun e da las vischnancas. Ellas servan sco basa per elavurar normas giuridicamain liantas eventualmain necessarias sin plaun chantunal e communal.

Documents

Directivas per promover l'integraziun da persunas estras en Grischun

Resumaziun da las directivas per promover l'integraziun

Finamiras

En ses rapport ha la cumissiun enumerà ils champs d'acziun ils pli impurtants ch'èn relevants per l'integraziun en il futur e formulà recumandaziuns respectivas. Questas recumandaziuns han las suandantas finamiras:

  • promover la chapientscha da las linguas e la communicaziun tranter las culturas sin tut ils plauns;
  • intermediar infurmaziuns che s'orienteschan als basegns tant a persunas immigradas sco er a persunas indigenas;
  • ina politica da furmaziun che stgaffescha las premissas meglras pussaivlas per avair success en scola e per entrar en il mund professiunal;
  • in'economia che surpiglia sia responsabladad sociala en il sectur da l'integraziun e che avra perspectivas professiunalas per sias collavuraturas e per ses collavuraturs esters;
  • posts d'administraziun ch'èn sensibilisads per l'interculturalitad e che rendan accessiblas lur prestaziuns a tuttas ed a tuts.

Princips da la politica d'integraziun dal chantun Grischun

Integraziun – ina incumbensa per tut la societad

La premissa per ina cuminanza paschaivla èn il respect vicendaivel sco er la vicendaivladad da dretgs e d'obligaziuns. Ina integraziun cun success pretenda da las persunas immigradas in engaschament activ per sa participar – tut tenor lur pussaivladads – a la vita economica e sociala. Correspundentamain sto la societad che las recepescha renconuscher la contribuziun sociala ed economica da la populaziun estra, esser averta per il barat e pronta per la participaziun.

Integraziun − esser conscient da la varietad

La varietad culturala e sociala è ina part integrala da nossa societad. Las persunas estras vegnan prendidas seriusas sco individis socials e pauschalisaziuns plain pregiudizis areguard l'appartegnientscha culturala, etnica, religiusa u naziunala èn d'evitar. Differenzas che derivan da l'origin na dastgan betg chaschunar inegualitads socialas en ils secturs impurtants da la vita, sco p.ex. la scola, la furmaziun, la lavur e la situaziun d'abitar.

Integraziun – realisar l'egualitad da las schanzas

L'integraziun ha sco finamira che tut las gruppas da la populaziun hajan las medemas schanzas per l'access a la vita economica e sociala. Per che las persunas indigenas e las persunas immigradas hajan pussaivladads equivalentas da sa fixar finamiras ed er da cuntanscher quellas, ston eventuals impediments per l'access vegnir eliminads, q.v.d. ils access instituziunals ston esser garantids per tuts.

Integraziun – profitar da potenzials e da resursas

Las persunas estras duain vegnir percepidas areguard lur abilitads ed areguard lur potenzials e betg sut l'aspect da deficits, sco p.ex. enconuschientschas linguisticas manglusas. Ina promoziun sistematica e persistenta da l'integraziun s'orientescha vi dals basegns, vi da las cumpetenzas e vi da las resursas da tut las parts ch'èn participadas al process d'integraziun, ed ella profita dals potenzials, da las abilitads e da las cumpetenzas avant maun. Uschia creescha ella perspectivas da svilup per tut las parts da la populaziun.

Integraziun – ina incumbensa da las structuras regularas

L'integraziun vegn promovida en il rom da las structuras regularas, q.v.d. ella ha lieu en tut ils secturs socials e tutga a la responsabladad dals posts cumpetents. Quels dattan l'attenziun necessaria a la circumstanza che la situaziun da partenza per las persunas estras n'è betg tuttina sco quella da las persunas indigenas, ed els han la finamira da drizzar la paletta da lur prestaziuns e da lur purschidas tenor ils differents basegns.

Integraziun – promover las cumpetenzas socialas

La promoziun specifica da l'integraziun vegn fatga en moda subsidiara e sa drizza a persunas che n'han nagin access a las structuras regularas. Ella iniziescha il process d'integraziun cun promover abilitads socialas e culturalas sco la cumpetenza linguistica e las enconuschientschas da las reglas da cumportament e da las normas. Ella cumplettescha e sustegna en quest connex las purschidas da las structuras regularas.

Integraziun – ina premissa per la natiralisaziun

L'integraziun descriva – ultra dal process social – er in cumportament individual ch'è caracterisà d'in engaschament activ d'ina tscherta durada e che po chattar sia fin positiva en la natiralisaziun cun la participaziun activa a las votaziuns ed a las elecziuns communalas, chantunalas e federalas.