Zum Seiteninhalt

Energia

Sco purtader d'energia ecologica ha la forza idraulica ina gronda valur en il Grischun. Passa in tschintgavel da l'electricitad svizra che vegn producida cun forza idraulica deriva dal Grischun.

Auals, flums e lais èn ina part da la cuntrada muntagnarda grischuna fascinanta. Ultra da las funtaunas mineralas ch'èn per part enconuschentas sin l'entir mund ed ultra da la cultura da bogns e d'aua da baiver ha l'aua ina valur nunstimabla er sco funtauna d'energia.

-
©Sedrun Disentis Tourismus

Electricitad grischuna per la Svizra

La producziun d'electricitad da las ovras idraulicas grischunas è da gronda impurtanza per l'economia publica svizra. Cun annualmain 7,9 milliardas uras kilowat (kWh) en media furnescha il Grischun passa in tschintgavel da l'electricitad svizra che vegn producida cun forza idraulica. Las ovras idraulicas dal Grischun furneschan var in dieschavel da tut l'electricitad che vegn producida en Svizra. La valur particulara da questa energia è sia qualitad. Ils lais d'accumulaziun permettan numnadamain da deponer l'aua uschè ditg, fin ch'i dovra particularmain blera electricitad (enviern, tschertas uras dal di). Quai permetta da producir energia d'auta qualitad per il consum maximal.

A favur da l'utilisaziun da la forza idraulica sco contribuziun per la protecziun dal clima pleda cunzunt l'argument che l'electricitad, che vegn producida or da forza idraulica, è ina energia natirala e regenerabla che na producescha betg CO2 e che na chaschuna betg in effect da serra. Er areguard tut ils aspects ecologics fa la forza idraulica la meglra figura en cumparegliaziun cun las pussaivladads da producir electricitad ch'èn oz enconuschentas.

Creaziun da grondas valurs

Il Grischun s'engascha per in'utilisaziun chantunala, naziunala ed internaziunala da la producziun indigena d'electricitad. El promova che las ovras idraulicas existentas vegnian renovadas u engrondidas en ina moda ch'è raschunaivla per l'economia e ch'è giustifitgabla per l'ambient.

Las ovras electricas occupan tut en tut circa 540 persunas. Las ovras electricas pajan in terz da las taglias da las persunas giuridicas en il Grischun. Sche tut las taglias, tut las taxas e tut ils tschains vegnan quintads ensemen, pajan las ovras electricas annualmain circa 153 milliuns francs. Questas prestaziuns èn d'ina impurtanza essenziala per las finanzas dal chantun e da numerusas vischnancas. Construind las ovras electricas, han ins ultra da quai erigì u meglierà en bleras vals las vias ed auters edifizis d'infrastructura che na servan betg mo a las ovras electricas.