Zum Seiteninhalt

Agricultura e selvicultura

En il Grischun, il chantun da muntogna, han l'agricultura e la selvicultura ina impurtanza speziala. Tut en tut 6 pertschient da las persunas occupadas lavuran en quest sectur.

Las puras ed ils purs grischuns tgiran la cuntrada a travers l'artg alpin. Da las ivas e da las chastognas en il sid sur las Alps las pli autas e sur las spundas las pli stippas da las bleras valladas fin en la Val dal Rain grischuna, nua che tut ils fritgs d'er creschan e nua che las ivas vegnan torcladas ad in dals megliers vins da la Svizra.

-

 

Las puras ed ils purs grischuns èn per regla puras e purs da muntogna. Mo 7 pertschient dals 2445 manaschis agriculs èn situads en la regiun da planira, tut ils ulteriurs sa chattan en il territori da muntogna. Las puras ed ils purs da muntogna dal Grischun èn innovativs e produceschan en accord cun la natira. Var 50 pertschient dals manaschis vegnan manads tenor directivas biologicas.

Products attractivs

Or da ca. 25 pertschient dal latg vegni fatg oravant tut chaschiel da muntogna grischun. Er la pulpa ed il salsiz grischun èn enconuschents a blera glieud. Tuttina è avant maun in grond potenzial commerzial en quest sectur. La collavuraziun da las puras e dals purs cun il turissem grischun porscha ina schanza unica latiers. L'uniun "alpinavera" cun sedia a Cuira ch'è vegnida fundada da producentas e da producents sco er d'elavuraturas e d' elavuraturs dals chantuns da muntogna Uri, Glaruna e Grischun dat access als products e promova la vendita.

Numerusas plazzas da lavur

Er la selvicultura è impurtanta per l'economia en il Grischun. En tut il chantun existan var 670 plazzas da lavur en l'economia forestala (manaschis forestals privats e publics) e l'industria da laina dumbra circa 650 plazzas da lavur. En il Grischun tutgan cun 85 pertschient la part la pli gronda dals guauds a las vischnancas. La reserva da laina importa circa 51 milliuns meters cubic. Ils ultims 4 onns èn vegnids utilisads en ils guauds publics e privats en media 405 000 meters cubic laina per onn.

Il guaud na furnescha dentant betg mo il lain, il material da construcziun e d'energia desiderà. El ademplescha er bleras autras funcziuns impurtantas. El protegia cunter lavinas, cunter crudada da crappa e cunter bovas, el è il spazi da viver per bleras spezias indigenas d'animals e da plantas e stat ultra da quai a disposiziun a tuts sco spazi da recreaziun e d'aventura.