tras la confederaziun

La lescha d'asil e la lescha federala davart las persunas estras ch'èn entradas en vigur il 1. da schaner 2008 reglan detagliadamain ils princips e las finamiras da l'integraziun, las contribuziuns e las obligaziuns da las persunas estras sco er las cumpetenzas e la collavuraziun tranter la confederaziun ed il chantun. Ultra da quai ha la confederaziun relaschà in program d'accents cun l'intent da promover l'integraziun per ils onns 2008 fin 2011.

Ulteriuras infurmaziuns chattais Vus sut ils links en la colonna a dretga.


tras ils chantuns

L'incumbensa dal post spezialisà per l'integraziun è quel da diriger e da coordinar l'integraziun sin plaun chantunal sco er sin plaun communal. Er sche la promoziun da l'integraziun sto vegnir fatga da princip en il rom da las structuras regularas (scolina, scola, furmaziun professiunala, martgà da lavur, fatgs da sanadad euv.), pon – promovend projects e mesiras chantunalas d'integraziun – vegnir serradas largias en las structuras regularas resp. vegnir sustegnidas persunas estras, che n'han nagin access a las structuras regularas, en lur process d'integraziun. Il post spezialisà sustegna projects per promover l'integraziun linguistica e sociala da persunas estras che vivan en il chantun Grischun. Ultra da quai po el vegnir consultà tar la planisaziun e tar la realisaziun da projects d'integraziun. Promovids vegnan projects e mesiras persistentas d'integraziun che sa drizzan directamain a las persunas estras e che prendan en mira la gulivaziun da persunas ch'èn spezialmain degnas da vegnir promovidas sco dunnas, uffants e giuvenils.