Navigaziun principala

Cuntegn da la pagina

Post central MNA

Minorens betg accumpagnads (MNA)

 Minorens betg accumpagnads (Mineurs Non Accompagnés) resp. uschenumnads MNA èn requirentas e requirents d'asil minorens, persunas minorennas admessas provisoricamain, fugitivas e fugitivs minorens sco er fugitivas e fugitivs minorens admess provisoricamain che sa trategnan en Svizra senza lur geniturs u senza in'autra persuna che ha la tgira genituriala.

Cumpetenzas ed incumbensas dal Post central MNA

Il Post central MNA garantescha l'assistenza e la represchentanza legala per tut ils minorens betg accumpagnads che vegnan attribuids al chantun Grischun.

Per mantegnair il bainstar da l'uffant e per evitar ulteriuras interrupziuns da relaziuns vegnan ils uffants ed ils giuvenils – independentamain da lur domicil entaifer il chantun – accumpagnads, cussegliads e sustegnids tras il Post central MNA en differents secturs da la vita, fin ch'els èn maiorens. En spezial vegnan garantidas l'assistenza e l'educaziun, la determinaziun dal lieu da dimora, la promoziun e la protecziun dal svilup corporal, spiertal e moral sco er la represchentanza giuridica.

Per quest intent fa il Post central MNA per incumbensa e sut la surveglianza sco er coordinaziun da la APUC Partenz/Tavau – supplementarmain a las incumbensas da la persuna da confidenza tenor la Lescha d'asil – assistenzas da represchentanza tenor l'art. 306 al. 2 CCS. Quellas cumpiglian tranter auter er la collavuraziun cun autoritads, cun partenaris, cun scolas, cun instituziuns staziunaras, cun il sectur da sanadad e cun ulteriuras acturas ed ulteriurs acturs sco er la tschertga d'ina structura dal di adequata e d'ina furma d'abitar adattada. Ultra da quai gida il Post central MNA ils uffants ed ils giuvenils confurm a lur basegns a promover lur resursas, sco per exempel la furmaziun scolastica u professiunala – er suenter ch'els èn daventads maiorens, fin ch'els han terminà l'emprima scolaziun.