Cuntegn da la pagina

Public Key Infrastructure (PKI)

Per l'elavuraziun da datas e per la communicaziun dovra l'administraziun publica l'internet. En quest connex gioga la segirezza ina rolla impurtanta. Cun l'infrastructura da clavs publicas (Swiss Government PKI) dispona l'Uffizi federal d'informatica e da telecommunicaziun (UFIT) d'ina tecnologia da segirezza da basa ideala per la Confederaziun, per ils chantuns e per las vischnancas.

La Swiss Government PKI ch'è vegnida installada dal UFIT oriundamain per sustegnair la communicaziun segira per e-mail, e vegnida messa en funcziun il 1. da schaner 2001. Il chantun Grischun ha introducì la tecnologia la fin da l'onn 2004 e dovra quella oz principalmain en ils suandants secturs:

  • autentificaziun ad applicaziuns federalas
  • codaziun da datas
  • signatura digitala

Tenor il conclus da la Regenza dals 7 d'avust 2018 è l'Uffizi da migraziun e da dretg civil (UMDC) cumpetent per emetter certificats da PKI sco er per occupar il post responsabel per PKI. Il UMDC maina in post da registraziun (Local Registration Authority, LRA) en il Center da documents d'identitad a Cuira ed en il Center da documents d'identitad regiunal a Zernez. Il LRA a Zernez è cumpetent per las regiuns Malögia, Engiadina Bassa/Val Müstair e Bernina ed il LRA a Cuira per las ulteriuras regiuns dal chantun Grischun.

Las funcziunarias ed ils funcziunaris dal LRA adempleschan las suandantas incumbensas:

  • elavurar e consegnar smart-cards cun certificats da la classa B
  • renovar certificats da la classa B
  • revocar certificats da la classa B
  • debloccar il PIN