Cuntegn da la pagina

Persunas privatas e gruppas

Cun tgirar uffants, far cumpras, tgirar animals (manar a spass chauns, pavlar giaglinas e.u.v.), barattar cudeschs u cun in simpel telefonat a persunas che vivan sulettas: La societad civila po sa gidar vicendaivlamain ed è ussa dumandada.

Nus As recumandain las suandantas plattafurmas per sa colliar directamain al lieu. Persunas che tschertgan agid pon plazzar là lur basegns, e persunas che gidan pon publitgar purschidas:

Plattafurmas regiunalas

Plattafurma-web: #GRhelp – In’acziun da GRhome

Temps extraordinaris pretendan soluziuns extraordinarias. Quai han er ils creaturs da la plattafurma GRhome pensà, la pagina-web che porscha normalmain inspiraziuns turisticas. Tenor ina communicaziun a las medias ha la Cuminanza d'interess turissem en il Grischun perquai inizià la nova plattafurma GRhelp. L’idea è simpla: Sin la plattafurma vegnan differentas purschidas d’agid publitgadas e survegnan uschia attenziun en l’entir chantun.

Las purschidas èn differentas e consistan da purschiders privats e commerzials. Manaschis da gastronomia procuran cun servetschs da pasts u take aways per l’alimentaziun. Auters manaschis commerzials porschan furniziuns a chasa sco per exempel per nutriment, plantas, cudeschs, material da biro e diversas autras spezialitads. Persunas privatas sa porschan per exempel da gidar a far cumissiuns.

Plattafurma-web: InsemBEL

«InsemBEL» è la plattafurma engiadinaisa, nua ch’i vegn purschì e dumandà a moda nuncumplitgada ed anonima per agid. La plattafurma collia il Grischun dal Sid durant in temp che pretenda in spiert da cuminanza.

Plattafurma-web: Il Grischun furnescha!

La vita en il Grischun cuntinuescha. Numerusas interpresas grischunas han fatg da la necessitad ina virtid ed han creà bleras purschidas: servetschs da furnir a chasa, chaschas da brevs per retrair rauba u er agens commerzis online e spediziuns postalas.

 

Plattafurmas naziunalas

Plattafurma d'internet: hilf-jetzt.ch

-

Sin hilf-jetzt.ch pudais Vus chattar a maun da Voss numer postal (u da las vischnancas vischinas) gruppas che porschan agid local.

Tgi che tschertga agid, chatta qua ina glista da datas da contact u da gruppas da Facebook, da WhatsApp u da Telegram che porschan agid.

Tgi che vuless gidar, po daventar commember d'ina gruppa existenta u gist stgaffir ina nova gruppa.

App: FiveUp

FiveUp
L'app FiveUP pussibilitescha la communicaziun nuncumplitgada tranter persunas che vulan gidar e talas che dovran sustegn.

Tgi che sa registrescha tar FiveUp, po far dumondas d'agid u registrar sez purschidas sin ina charta. I pon er vegnir installadas gruppas serradas. Las datas da contact vegnan uschia barattadas pir, cur che tuttas duas varts dattan il consentiment.
L'app FiveUp vegn sustegnida da la Crusch Cotschna Svizra e da la Societad svizra d'utilitad publica ed è disponibla per Android e per iOS.

 

 


Impurtant
Savens èn questas gruppas organisadas sur l'internet u sur apps. Sche Vus n'utilisais betg medias socialas, dumandai persunas enconuschentas (p.ex. scolaras u scolars, uffants) per agid tar l'intermediaziun da contacts. Per voluntarias e voluntaris èsi er central che persunas senza access a l'internet vegnian rendidas attentas a la purschida. Enconuschais Vus persunas attempadas che dovran sustegn, ma che n'èn betg activas en las medias socialas? Gidai ellas a stabilir contacts cun uniuns u cun voluntarias e voluntaris.

Faschai per plaschair attenziun d'observar conscienziusamain tar tut las interacziuns las mesiras d'igiena e las instrucziuns d'agir dal UFSP. bei sämtlichen Interaktionen gewissenhaft zu befolgen.