Vulais Vus inoltrar ina fotografia da passaport per il permiss da manischar u per il permiss per emprender a manischar? Sut tschertas premissas pudais Vus far quai online.
Infurmaziun impurtanta: Sch'i sa tracta d'ina emprima dumonda per in permiss da manischar u per in permiss per emprender a manischar svizzer, na po la fotografia betg vegnir inoltrada sin via digitala, perquai che l'emprim sto vegnir controllada Vossa identitad.
Per elavurar Vossa fotografia da passaport duvrain nus en mintga cas in dals formulars menziunads qua sutvart emplenì cumplettamain e suttascrit.
Emissiun d'in nov permiss da manischar
Dumonda da conceder in permiss per emprender a manischar / Dumonda da midar in permiss da manischar da l'exteriur
Decleraziun da perdita da documents
Dumondas e respostas
Jau hai inoltrà online mia fotografia. Tgenins èn ils ulteriurs pass?
Inoltrai per plaschair per posta entaifer 10 dis il formular da dumonda emplenì cumplettamain, cun tut ils documents necessaris.
Suenter che nus avain survegnì tut ils documents, vegnin nus ad elavurar quels.
Tge capita cun mia fotografia suenter l'avair chargiada si?
Sche Vossa dumonda per in permiss per emprender a manischar u per in permiss da manischar emplenida cumplettamain e cun ils documents necessaris è entrada tar nus, vegn Vossa fotografia surpigliada ed arcunada en noss sistem.
Sche Vus n'inoltrais nagina dumonda suenter avair chargià si Vossa fotografia, vegn la fotografia chargiada si stritgada en la banca da datas suenter 90 dis.
Vus avais la pussaivladad, d'inoltrar la fotografia danovamain.
Quant custa l'inoltraziun digitala d'ina fotografia?
L'inoltraziun digitala d'ina fotografia è gratuita per Vus.
Jau vi resp. stoss inoltrar ina fotografia da passaport analoga (stampada), tge stoss jau resguardar?
Format
- Grondezza da la fotografia 35 x 45 mm (senza ur)
- Autezza da la fatscha dal mintun fin a la cuppa da la chavazza min. 29 mm e max. 34 mm.
Qualitad da la fotografia
- I vegnan admessas mo fotografias actualas.
- Il palpiri da la fotografia sto avair ina surfatscha glischa, betg structurada.
- Per producir las fotografias dastga vegnir duvrà mo palpiri ch'è previs spezialmain per maletgs da fotografias.
- Il palpiri na dastga avair naginas faudas, naginas tartagnadas e nagins urs radunds.
- La fotografia sto esser clera cun ina illuminaziun regulara. Nagina structura da pixels na dastga esser visibla.
Pretensiuns al maletg da fotografia
- Spatlas gulivas ed egliada directamain en la camera (fotografia frontala).
- Egls averts e visibels (er tar persunas che portan egliers).
- Expressiun da la fatscha duai esser amicabla / neutrala. La bucca sto restar serrada.
- Fund d'ina colur, unitar e neutral; naginas sumbrivas.
- Ina cuvrida-chau n'è da princip betg permessa. Nagin fruntal u bindel da chavels evident che dat en egl u nagins egliers stuschads sin il chau e.u.v.
Excepziuns èn permessas mo per motivs medicinals u religius cumprovads (per mungias u per persunas che fan part d'ina cuminanza religiusa che perscriva da purtar ina cuvrida-chau en la publicitad). En quest cas vala: La fatscha sto esser visibla almain da l'ur sut dal mintun fin a la basa dals chavels. I na dastga dar naginas sumbrivas sin la fatscha.
La basa e las pretensiuns èn ils criteris per l'acceptaziun da fotografias per passaports e per cartas d'identitad da l'Uffizi federal da polizia.