Permiss da manischar en il format da carta da credit (PCC)

Dapi il 1. d'avrigl 2003 vegn emess il nov permiss da manischar en il format da carta da credit. Quel na cuntegna nagina adressa pli. En cas che Vus giais a star en in auter chantun, na stuais Vus betg pli laschar remplazzar il permiss da manischar. Midadas d'adressa stuais Vus dentant adina annunziar a noss uffizi u a l'uffizi per il traffic sin via da Voss nov chantun da domicil (en il Grischun basta ina communicaziun per telefon). 

In nov permiss da manischar sto vegnir emess en ils suandants cas:

• midada dal num e/u dal lieu d'origin (per plaschair preschentar ina carta d'identitad u – en cas d'ina spediziun postala – agiuntar ina copia da la carta d'identitad al formular da dumonda)

• acquist d'ina categoria supplementara u renunzia ad ina categoria existenta

• suenter ch'il permiss è vegnì prendì davent

Il PCC ha blers avantatgs:

• La protecziun da datas è garantida: il PCC na cuntegna nagin chip che permettess d'arcunar datas electronicas

• Segirezza optimala cunter falsificaziuns tras caracteristicas da segirezza integradas

• Armonisaziun europeica da las categorias

• Format pratic

• Il PCC tegna ditg, sch'el vegn tractà adequatamain

Remplazzament dal permiss da manischar blau

Sche Vus vulais laschar remplazzar Voss permiss da manischar blau tras in PCC, pudais Vus retrair il formular da dumonda correspundent tar Vossa controlla d'abitantas e d'abitants / administraziun communala u tar l'uffizi per il traffic sin via. Vus pudais er chargiar giu il formular sco datoteca da PDF e l'emplenir al computer (duvrai per plaschair mo palpiri alv per stampar).

Il formular sto vegnir suttascrit cun colur naira, ed en il lieu previs sto vegnir tatgada ina fotografia da passaport da colur. Ensemen cun il permiss da manischar blau sto il formular vegnir tramess a noss uffizi (en cas da midadas dal num e/u dal lieu d'origin per plaschair er agiuntar ina copia da la carta d'identitad).

Definiziun categorias

Las definiziuns singulas da las categorias dal permiss da manischar ed ulteriuras infurmaziuns tar autorisaziuns e restricziuns en il permiss da manischar anflais Vus qua.