Amt für Soziales
Uffizi da fatgs socials
Ufficio degli affari sociali
La Convenziun davart ils dretgs dals umans cun impediments (CRPD) è ina cunvegna da las Naziuns Unidas (ONU) che tracta ils dretgs da las persunas cun impediments. 182 stadis han suttascrit la convenziun. Er la Svizra è in da quests stadis. Dapi l'onn 2014 è questa convenziun en vigur en Svizra.
La Convenziun da la ONU davart ils dretgs dals umans cun impediments declera ils dretgs umans generals per la situaziun da viver speziala da las persunas cun impediments. La CRPD ONU fixescha trais finamiras principalas:
La Svizra ha suttascrit la Convenziun da la ONU davart ils dretgs dals umans cun impediments. Perquai vala questa convenziun er per il chantun Grischun.
La Regenza ha dà l'incumbensa a l'Uffizi per fatgs socials d'examinar la situaziun en il Grischun. Ils onns 2022/2023 avain nus fatg ina survista da la situaziun. En quest connex avain nus organisà tranter auter er workshops cun persunas cun impediments. Il studi è vegnì realisà dad Interface Politikstudien Forschung und Beratung SA da Lucerna.
L'analisa da la situaziun ha dà in bun attestat al chantun Grischun. En il Grischun vegnan gia realisadas diversas activitads multifaras a favur da las persunas cun impediments. En cumparegliaziun cun ils ulteriurs chantuns da la Conferenza da las directuras e dals directurs chantunals dals affars socials da la Svizra orientala e dal chantun Turitg (CDAS ost+Turitg) sa posiziunescha il chantun Grischun cun sias cundiziuns generalas e cun sias activitads en in plaz sur la media. Las fermezzas sa mussan en ina purschida multifara d'abitar e da lavurar, en la scola integrativa sco er en ils secturs dal sport e da la cultura.
Ils resultats vegnan preschentads en in lung rapport (mo per tudestg) ed en ina resumaziun.
L'onn 2025 è vegnì stgaffì in post spezialisà e da coordinaziun per l'egualitad e per ils dretgs da las persunas cun impediments. Cun quai fa il chantun Grischun in pass impurtant per resguardar anc pli fitg ed en moda coordinada ils interess da las persunas cun impediments sco er per infurmar e per sensibilisar la societad concernent ils giavischs da las persunas cun impediments.
Ina da las incumbensas dal post spezialisà e da coordinaziun è per exempel d'elavurar vinavant las recumandaziuns ord l'analisa e d'adattar quellas per la realisaziun en furma adequata.
Il post spezialisà chantunal documentescha la realisaziun da las mesiras en in rapport e suttametta quest rapport periodicamain a la Regenza per prender enconuschientscha.
Avais Vus dumondas u giavischs? Jean-Pierre Schneckenburger, manader Post da coordinaziun per ils dretgs da las persunas cun impediments, è gugent qua per Vus. En l'entir chantun accumpogna e promova el projects ed è la persuna da contact per dumondas davart ils dretgs e l'egualitad da persunas cun impediments. Vus pudais telefonar (+41 81 257 26 98) u scriver in e-mail (Jean-Pierre.Schneckenburger@soa.gr.ch).
Cun questa newsletter As tegnain nus al current.
La newsletter è scritta per part en lingua facila.
Gugent pudais Vus s'annunziar cun in curt e-mail a behindertenintegration@soa.gr.ch a la newsletter.