Uniuns da geniturs da di intermedieschan geniturs da di a geniturs. Per regla surpiglian uniuns da geniturs da di las suandantas incumbensas:

• realisar proceduras d'annunzia cun geniturs da di
• far contracts da lavur cun geniturs da di
• intermediar geniturs da di adattads a famiglias
• far contracts d'assistenza tranter la clientella (geniturs) ed ils emploiads (geniturs da di)
• accumpagnar relaziuns d'assistenza da di

Las uniuns da geniturs da di garanteschan la segirezza giuridica e finanziala dals geniturs da di ed organiseschan furmaziuns fundamentalas e supplementaras.

Permissiun

Geniturs da di che tgiran il medem mument dapli che trais uffants da la vegliadetgna prescolara u scolara valan sco grondas famiglias da di. Per recepir uffants e giuvenils dovri ina permissiun, sch'i vegnan tgirads durant il di u la notg il medem mument quatter u dapli uffants da la vegliadetgna prescolara u scolara. L'uffizi dal servetsch social è cumpetent per conceder ina permissiun. Ultra da quai ha el la surveglianza.

Sch'ina uniun da geniturs da di assista ina u pliras grondas famiglias da di, dovra l'uniun da geniturs da di ina permissiun. Novas uniuns da geniturs da di che assistan grondas famiglias da di ston disponer d'ina permissiun da manaschi, avant ch'ellas cumenzan cun lur lavur.

L'uffizi dal servetsch social conceda resp. renovescha ina permissiun da manaschi, sche las uniuns da geniturs da di observan las prescripziuns concernent las directivas da qualitad da l'uffizi dal servetsch social. Las directivas da qualitad cumpletteschan l'ordinaziun federala davart il plazzament d'uffants per la tgira e l'adopziun sco er la lescha davart ils uffants confidads dal chantun Grischun.

Finanziaziun

En il chantun Grischun vegnan las uniuns da geniturs da di finanziadas tras contribuziuns dals geniturs, tras donaziuns sco er tras contribuziuns dal chantun e da las vischnancas. Las contribuziuns sa basan sin ina tariffa dals custs normads per unitad d'assistenza, che vegn fixada da la regenza dal chantun Grischun. Per tut las uniuns da geniturs da di vala la medema tariffa. Las suandantas purschidas survegnan contribuziuns chantunalas e communalas

• Purschidas da tgira per uffants da la vegliadetgna prescolara (p.ex. canortas d'uffants, uniuns da geniturs da di)
• Purschidas d'assistenza per uffants da scola durant las vacanzas da scola

Actualmain sustegnan il chantun e las vischnancas novas purschidas durant ils emprims 3 onns cun mintgamai 25 pertschient dals custs normads e purschidas existentas cun mintgamai 20 pertschient. Las premissas las pli impurtantas per survegnir subvenziuns èn:

• la purschida sto vegnir manada sin basa d'utilitad publica;
• la purschida sto correspunder a la planisaziun dal basegn da la vischnanca;
• in'assistenza suffizienta e qualifitgada sto vegnir garantida, e quai en localitads ch'èn adattadas per quai;
• las tariffas ston vegnir graduadas tenor la capacitad economica da las persunas cun la pussanza dals geniturs.

Agids finanzials da la confederaziun

La confederaziun sustegna instituziuns d'assistenza cun contribuziuns per installar, per extender la purschida sco er per coordinar l'assistenza en famiglias da di. Infurmaziuns pli detagliadas chattais Vus sin la pagina d'internet da l'uffizi federal d'assicuranzas socialas (UFAS).

Documents

Dumonda per la renconuschientscha da la contribuziun (canortas d'uffants / uniuns da geniturs da di)

Finanziaziun: Annunzia pesteriura da basegn (canortas d'uffants / uniuns da geniturs da di)

Ordinaziun davart la finanziaziun extraordinaria da la tgira d'uffants cumplementara a la famiglia en il chantun Grischun pervia dal coronavirus