Sozialamt
Uffizi dal servetsch social
Ufficio del servizio sociale
Integraziun da persunas cun impedimentsGrabenstrasse 87001 Cuiratel +41 81 257 26 54fax +41 81 257 26 48behindertenintegration@soa.gr.ch
Lescha davart l'integraziun sociala e professiunala da persunas cun impediments (lescha d'integraziun da persunas cun impediments, LIPI; DG 440.100)
La finamira da l'accumpagnament da lavur è quella da promover l'integraziun da persunas cun impediments en la societad ed en l'emprim martgà da lavur. Quai duai vegnir cuntanschì cun indemnisar las prestaziuns d'assistenza professiunalas punctualas per persunas cun impediments che lavuran en l'emprim martgà da lavur. L'accumpagnament da lavur vegn furnì d'ina instituziun u d'ina organisaziun (LIPI art. 4 al. 4).
A medem temp po vegnir distgargià e sustegnì la patruna u il patrun. La plazza da lavur per ina persuna cun impediments duai vegnir mantegnida, er sch'i dat difficultads.
Ina permissiun è necessaria per tut las furnituras e per tut ils furniturs da prestaziuns che vulan metter a disposiziun ina purschida d'assistenza per persunas cun impediments (LIPI art. 15).
Ina permissiun vegn dada u renovada, sche las pretensiuns envers la qualitad, envers la gestiun ed envers la furma d'organisaziun èn garantidas. Quai vul dir che l'assistenza sto vegnir garantida tras avunda persunal e tras persunal qualifitgà, ils dretgs da las persunas cun impediments e dals confamigliars èn garantids, in post da mediaziun è numnà e la gestiun è garantida finanzialmain ed organisatoricamain.
Las directivas ed ils criteris da qualitad per l'accumpagnament da lavur s'orienteschan vi da las directivas da qualitad per plazzas da lavur protegidas.
La dumonda per ina permissiun sto vegnir inoltrada confurm a las prescripziuns che sa chattan en il schema da las permissiuns da manaschi per furnituras e furniturs da prestaziuns da l'accumpagnament d'abitar e da lavur per persunas creschidas cun impediments en il chantun Grischun.
La consideraziun e la regulaziun cumplessiva da las purschidas per persunas cun impediments vegn fatga cun agid da l'analisa dal basegn e da la planisaziun da la purschida.
L'analisa dal basegn permetta da registrar e da giuditgar las datas necessarias davart il basegn da las persunas cun impediments sco er davart las purschidas ch'èn avant maun. L'analisa dal basegn è pia la basa per la planisaziun da la purschida, L'analisa dal basegn e la planisaziun da la purschida vegnan fatgas cun in orizont temporal a curta vista ed a vista mesauna.
La finanziaziun da las prestaziuns d'assistenza vegn fatga sin basa dal basegn d'assistenza individual da las persunas cun impediments e sin basa da las calculaziuns dals custs da las furnituras e dals furniturs da prestaziuns. Uschia po vegnir fixada ina pauschala da prestaziun per stgalim d'assistenza.
L'import da las pauschalas da prestaziun s'orientescha a las calculaziuns dals custs da las furnituras e dals furniturs che realiseschan prestaziuns en moda economica. Questas pauschalas vegnan eruidas cun agid da cumparegliaziuns da las prestaziuns tranter las instituziuns ed ils svilups dals custs.