Zum Seiteninhalt

Curs en la lingua ed en la cultura da la patria (LCP)

Scolaras e scolars da naziunalitad betg svizra pon vegnir instruids en la lingua, en l'istorgia e en la cultura da lur pajais.

En ils curs da LCP s'acquistan las scolaras ed ils scolars bunas abilitads en lur lingua da derivanza, e quai betg mo a bucca, mabain er en scrit. A medem temp amplifitgeschan ellas ed els lur enconuschientschas davart la cultura da lur pajais d'origin, p.ex. davart l'istorgia, davart la geografia, davart festas, davart la musica e davart las tradiziuns.

Curs da LCP gidan uschia a las scolaras ed als scolars d'autras culturas ad obtegnair ina furmaziun cumplessiva. Bunas enconuschientschas da la lingua d'origin èn d'impurtanza centrala per il svilup da l'atgna identitad, per il contact cun parents sco er per in eventual return en il pajais d'origin.

Ils curs vegnan purschids e responsads da purtaders sco consulats, ambassadas u associaziuns da geniturs. Il departament d'educaziun, cultura e protecziun da l'ambient recumonda da frequentar quests curs. La purschida è però voluntara.

Annunzia

L'annunzia succeda via la scola (scolasta u scolast da classa u cussegl da scola) u directamain via ils purtaders. A l'entschatta da l'onn da scola infurmeschan ils purtaders dals curs la scolasta u il scolast da classa davart l'organisaziun definitiva dals curs.