Navigaziun principala

Cuntegn da la pagina

Midada dal num

Persunas che vivan en il chantun Grischun e Grischunas e Grischuns che han lur domicil a l'exteriur, pon inoltrar ina dumonda per midar il num a l'Uffizi da migraziun e da dretg civil. Nus examinain, sch'i èn avant maun motivs respectabels per midar il num. Sche las premissas èn dadas, permettain nus la midada da num cun ina decisiun. Las taxas muntan per regla a 300.– fin 800.– francs.

Sche Vus avais ina naziunalitad estra, As recumandain nus da sclerir ordavant, sche l'autoritad da Voss lieu d'origin renconuscha la decisiun concernent ina midada da num d'ina autoritad svizra.

Infurmaziuns pli detagliadas davart las differentas constellaziuns e davart la procedura per ina midada da num chattais Vus en noss fegls d'infurmaziun.

Da la midada da num per motivs respectabels ston vegnir differenziads ils suandants cas:

  • Tras ina decleraziun ch'è pussaivla da tut temp davant l'Uffizi da stadi civil po il num da nubil vegnir reprendì suenter avair schlià la lètg u il partenadi registrà.
  • Tras ina decleraziun davant l'Uffizi da stadi civil po il num da famiglia d'uffants da geniturs nunmaridads vegnir midà pervia da la constituziun d'in dretg da tgira cuminaivel suenter la naschientscha (observar il termin dad 1 onn).
  • Tras ina midada simultana da l'inscripziun dal prenum e da l'inscripziun da la schlattaina en il Register da stadi civil svizzer. Dumondas correspundentas pon vegnir inoltradas tar la dretgira regiunala cumpetenta dal lieu da domicil.

Gugent As cusseglia la referendaria ch'è cumpetenta per midadas da num Heidi Beglinger er per telefon (tel. 081 257 26 29) u en scrit (heidi.beglinger@afm.gr.ch).