Negligientscha

Sco negligientscha vala il disturbi cuntinuant u repetì dal svilup d'uffants u giuvenils tras ina tgira insuffizienta e tras in cumportament d'educaziun inadequat.

Exempels: igiena e vestgadira insuffizienta, alimentaziun manglusa, surveglianza ed affecziun insuffizienta

Violenza corporala

La violenza corporala cumpiglia tut ils geners da violenza che han in effect sin l'integritad corporala d'uffants u giuvenils.

Exempels: culps, arsentadas, sbuglientadas, squitschadas, piztgadas, squassar l'uffant, chastis corporals, mutilaziun genitala feminina, sindrom da Münchhausen per procura

Violenza psichica

Violenza psichica è avant maun, sch'i vegn intermedià ad uffants e giuvenils, ch'els n'hajan nagina valur, sajan manglus, betg amads, betg giavischads, periclitads u mo da valur per cuntentar ils interess ed ils basegns d'autras persunas. Sco violenza psichica vala er, sche uffants u giuvenils èn exposts a violenza dals geniturs en il partenadi.

Exempels: degradaziun permanenta, isolaziun, umiliaziun, aspectativas memia autas u nunrealisticas, surprotecziun permanenta.

Violenza sexuala

Violenza sexuala èn acts sexuals cun uffants che vegnan fatgs da persunas creschidas u da giuvenils vid u davant in uffant. En quest connex vegni profità da l'inferiuradad corporala, psichica, cognitiva u linguistica da l'uffant, per al surpledar u sfurzar da cooperar u per viver ora pretensiuns da pussanza. Savens vegn l'uffant muventà da tegnair secret l'act tras violenza corporala, smanatschas, sentiments da culpa, appellaziuns da loialitad, empermischuns u extorsiuns.

Exempels: mulesta sexuala, tutgadas e bitschs sexualisads, grooming, exibiziunissem, masturbaziun, penetraziun orala, vaginala u anala

Facturs structurals

Er facturs structurals pon esser ina periclitaziun per uffants u giuvenils. Tschertas circumstanzas structuralas ston per se vegnir consideradas sco periclitaziun dal bainstar d'uffants e giuvenils. En la lavur pratica ston quellas adina puspè vegnir reflectadas.

Exempels: povradad, experientschas da guerra u da catastrofas, fugia