En las suandantas situaziuns dovri mesiras immediatas:

• Uffants u giuvenils vegnan actualmain maltractads corporalmain, abusads sexualmain, ubain i vegnan pronunziadas smanatschas respectivas ch'èn crediblas. Alternativamain exista il privel concret, che quai vegn a capitar (danovamain) las proximas uras u ils proxims dis.
• Uffants u giuvenils èn actualmain, las proximas uras u ils proxims dis en privel da vita pervia da negligientschas.
• Uffants u giuvenils pericliteschan considerablamain sasez e pudessan per exempel far suicidi. Els refusan dad ir a chasa, ubain in'autra tgira n'è betg garantida.
• Ils geniturs refusan ad ina persuna spezialisada u ad ina persuna da referiment da vesair ils uffants u giuvenils. Sch'il lieu da dimora dals uffants u giuvenils è nunenconuschent u sch'i dat indizis, ch'els duain vegnir manads ils proxims dis cunter lur voluntad en in lieu nunenconuschent.

Poppins ed uffants pitschens èn pli svelt periclitads acutamain che uffants pli vegls. Perquai ston mesiras immediatas vegnir examinadas a temp ed en cas da basegn vegnir realisadas immediatamain.

En cas d'ina periclitaziun acuta dal bainstar d'in uffant stoi vegnir examinà, co che la protecziun d'uffants u giuvenils po vegnir garantida il pli efficaziamain ed il pli svelt. En la gronda part dals cas sto vegnir fatga in'annunzia a l'Autoritad per la protecziun d'uffants e da creschids (APUC). Sche uffants èn periclitads acutamain u èn en privel da vita, sto vegnir infurmada la polizia.