Protecziun da l'uffant

Las disposiziuns davart la protecziun d'uffants (art. 307 fin 317 CCS) valan per tut ils uffants e giuvenils fin il 18. onn da vita. Tut tenor la vegliadetgna ston vegnir resguardads basegns da protecziun specifics e modas da proceder specificas. Cun la cumplenida da la maiorennitad (18 onns) sa midan las disposiziuns legalas – i sto vegnir applitgà il dretg da la protecziun da creschids. Il proceder sco er las mesiras ordinadas da la APUC sa midan.

En cas da malsegirezzas d'ir enturn cun periclitaziuns da persunas creschidas giuvnas a partir da 18 onns tras autras persunas u tras sasezzas, han persunas spezialisadas e persunas da referiment la pussaivladad da sa laschar cussegliar en moda anonima da la APUC.

Svilup disfavuraivel

Svilups disfavuraivels èn situaziuns gravantas che disturban ils uffants u giuvenils en lur svilup. Els tanschan da grevezzas cun influenzas minimalas sin il svilup fin a periclitaziuns dal bainstar d'uffants.

Cun svilups disfavuraivels è pia er manegiada la suandanta situaziun: I n'existan nagins indizis concrets per ina periclitaziun dal bainstar d'in uffant. En vista al basegn fundamental, als dretgs ed als basegns concrets d'uffants e giuvenils exista dentant tuttina in basegn da sustegn.

Cun utilisar las duas noziuns «svilups disfavuraivels e periclitaziun dal bainstar d'uffants» duai vegnir dà l'impuls da betg reagir mo sin periclitaziuns dal bainstar d'uffants. En spezial duain plitost er svilups disfavuraivels vegnir percepids e prendids serius a temp. Plinavant duai er vegnir reagì en moda proactiva sin grevezzas constatadas tar l'uffant, tar ils geniturs e tar las persunas da referiment ubain en l'ambient social. Cun infurmar, accumpagnar e sustegnair en moda simpla, adequata ed a temp duai vegnir gidà, che uffants e giuvenils pon crescher si en moda reussida.

Periclitaziun dal bainstar d'in uffant

En cas ch'il bainstar d'in uffant è periclità, sto la APUC intervegnir cun mesiras adattadas. L'incarica da protecziun respectiva da la APUC resulta da la lescha. Cun ina periclitaziun dal bainstar d'in uffant ston ins quintar, «uschespert ch'ins po prevair tenor las circumstanzas la pussaivladad seriusa d'in disturbi dal bainstar corporal, moral, spiertal u psichic da l'uffant». Sch'il bainstar d'in uffant è periclità, sto vegnir eruì cun considerar las circumstanzas dal cas singul.

Guardar er: COPUK, Merkblatt zum Kindesschutz, Seite 1a (mo per tudestg)