Cuntegn da la pagina

Procedura di domanda

Passaports e cartas d'identitad dal center da documents d'identitad
Tgi che vul empustar in document d'identitad, sto l'emprim far ina dumonda per telefon u sur l'internet. Suenter l'examinaziun dal dretg da pudair laschar far in document d'identitad, vegn fixà in termin per registrar las datas. Tar la preschentaziun persunala en il center da documents d'identitad vegn l'identitad verifitgada ed ils vegls documents d'identitad vegnan fatgs nunvalaivels. Las datas necessarias per pudair emetter il document d'identitad vegnan registradas. A partir da quest mument vegn il document d'identitad furnì entaifer max. 10 dis da lavur ed en il cas normal tramess directamain per posta.

La dumonda sur l'internet po vegnir fatga directamain sur il suandant link: Dumonda (DE)

Las petentas ed ils petents na ston betg preschentar fotografias, quellas vegnan fatgas exclusivamain e directamain en ils centers da documents d'identitad.

Las abitantas ed ils abitants dal district da la Moesa han la pussaivladad da laschar far passaports novs e cartas d'identitad er a Bellinzona sco er da laschar registrar là las datas biometricas:

Ufficio dei permessi
Via Lugano 4
6500 Bellinzona
Tel. 091 814 73 01

Cartas d'identitad sur la vischnanca da domicil
Tgi che preferescha vinavant da dumandar la carta d'identitad sur la controlla d'abitantas e d'abitants, sto sa preschentar persunalmain tar la vischnanca da domicil. Prender cun sai ston ins il vegl document sco er per regla ina fotografia da passaport actuala da buna qualitad en il format da 35 mm x 45 mm. Ma quai è mo pussaivel tar vischnancas ch'èn prontas d'acceptar dumondas da carta d'identitad. As infurmai tar Vossa vischnanca da domicil. Sche Vossa vischnanca da domicil n'offerescha betg pli la pussaivladad da dumandar ina carta d'identitad sur la controlla d'abitantas e d'abitants, sto quella vegnir dumandada tar in center da documents d'identitad.

Cartas d'identitad vegnan ad interim emessas vinavant senza chip da datas.

Persunas minorennas ed avugadadas ston sa preschentar en accumpagnament da lur represchentanza legala u preschentar in consentiment en scrit da quella.