Navigaziun principala

Cuntegn da la pagina

Agid social economic

L'agid social economic As vegn concedì, sche Vus n'avais betg il dretg da survegnir autras prestaziuns u sche quellas n'arrivan betg a temp. L'agid social economic garantescha in minimum d'existenza social che permetta la participaziun a las activitads socialas. El sa basa sin las leschas chantunalas sco er sin las directivas da la conferenza svizra da l'agid social (directivas da la COSAS). El sa cumpona sco suonda:

  • custs d'abitar
  • provediment medicinal da basa
  • basegn fundamental per ils custs da viver
  • agid individual (p.ex. custs per la tgira d'uffants u expensas en connex cun la professiun)

Survegnir agid social economic è collià cun dretgs ed obligaziuns. Per exempel survegn ins agid social, sch'ins ademplescha las premissas. Las obligaziuns cumpiglian per exempel l'obligaziun da cooperaziun: Per examinar il dretg sin agid social stuais Vus dar infurmaziuns e preschentar documents davart Vossa situaziun persunala e finanziala (p.ex. contract da locaziun, mussaments da banca). Sche Vus As stentais da meglierar Vossa situaziun e d'As integrar en il mund da lavur, survegnis Vus sustegn finanzial supplementar. Vus pudais er vegnir obligada u obligà da pratitgar in'activitad da gudogn supportabla. Uschiglio po l'agid social economic vegnir reducì.

Vossa vischnanca da domicil decida davart l'import e davart la durada da l'agid social economic. Essas Vus en ina situaziun da miseria finanziala? Ils servetschs socials regiunals As gidan a far ina dumonda per agid social economic. Els sclereschan Vossa situaziun finanziala, professiunala, famigliara e persunala. Els As infurmeschan davart Voss dretgs e Vossas obligaziuns, calculeschan il basegn da sustegn e fan la dumonda a la vischnanca cumpetenta. Sin fundament dals documents e d'eventuals scleriments supplementars dispona la vischnanca cumpetenta l'import e la durada da l'agid social economic.

Las prestaziuns d'agid social ston da princip vegnir restituidas (cf. document "Surannaziun da prestaziuns d'agid social"). Ultra da quai examinescha la vischnanca l'obligaziun da sustegn tenor il dretg da famiglia (sustegniment da persunas parentas).

 

Avais Vus dumondas u problems? Fixai in termin da cussegliaziun. As drizzai per plaschair al servetsch social regiunal da Vossa regiun.

Survista dals servetschs socials regiunals en il chantun Grischun

Documents

Dumonda per agid social economic a partir dal 2020 (mo per tudestg)