Persunas svizras pon acquistar il dretg da burgais communal da lur vischnanca da domicil ensemen cun il dretg da burgais chantunal, sch'ellas adempleschan las premissas legalas per ina natiralisaziun. Quellas sa differenzieschan sco tar la natiralisaziun da Grischunas e Grischuns tut tenor vischnanca burgaisa resp. – sch'ina tala manca – tenor vischnanca politica.

Premissas
Independentamain da la concepziun concreta sin plaun communal pon persunas svizras u grischunas sa laschar natiralisar en mintga cas, sch'ellas adempleschan las suandantas premissas:

• durada da domicil: 6 onns en la vischnanca da domicil ubain 6 onns domicil senza interrupziun avant l'inoltraziun da la dumonda
• reputaziun penala irreproschabla
• enconuschientscha da las relaziuns localas e participaziun a la vita sociala e cultural locala
• procuraziun da l'agen mantegniment e nagina dependenza actuala da l'agid social
• restituziun dals daners da l'agid social retratgs ils ultims 10 onns
• relaziuns finanzialas regladas

Contactai per plaschair l'autoritad communala cumpetenta per As infurmar davart las premissas da natiralisaziun eventualmain main severas che valan en Vossa vischnanca da domicil.

Procedura
La dumonda sco tala so vegnir inoltrada cun il formular uffizial e cun ils documents menziunads là a la vischnanca burgaisa u a la vischnanca politica. Quellas fan alura las retschertgas ch'èn necessarias per giuditgar las premissas da natiralisaziun. En cas da persunas che han gia il dretg da burgais d'ina autra vischnanca grischuna e pia il dretg da burgais chantunal, decida la vischnanca burgaisa resp. la vischnanca politica directamain davart la concessiun u la refusa dal dretg da burgais communal. Uschiglio dovri anc la concessiun dal dretg da burgais chantunal tras il departament da giustia, segirezza e sanadad dal chantun Grischun.

Formulars da dumonda
Formulars da dumonda pudais Vus retrair da la vischnanca burgaisa da Voss domicil u – en cas ch'ina tala manca – directamain da la vischnanca politica.

Dretgs da burgais vertents
En intgins chantuns ha la concessiun dal dretg da burgais communal e chantunal per consequenza ch'ils dretgs da burgais vertents van a perder. Sche Vus avais dumondas en quest connex, As adressai per plaschair a l'autoritad cumpetenta dal chantun, nua che Vus possedais il dretg da burgais.

En cas da dumondas pudais Vus gugent As drizzar a noss uffizi sut 081 257 36 80 u 081 257 26 27.