Zum Seiteninhalt

Rapport davart l'emprender

L’attestat po – ed en tscherts cas sto quel – vegnir cumplettà d’in rapport davart l’emprender. Il rapport davart l’emprender po vegnir formulà libramain. El dat scleriment davart il stadi actual da la cumpetenza da la materia sco er davart aspects impurtants dal cumportament d'emprender, da lavurar e dal cumportament social. Ultra da quai cuntegn el infurmaziuns detagliadas davart las resursas, las pussaivladads da svilup sco era davart la situaziun d’emprender particulara d’ina scolara resp. d’in scolar.

Il rapport d’emprender è formulà a moda concreta e clera, ma era chapibla. Expressiuns tecnicas vegnan evitadas sche pussaivel. Il rapport davart l’emprender vegn formulà senza valitaziuns.

 

In rapport davart l’emprender sto vegnir agiuntà per scolaras e scolars cun in basegn da promoziun spezial, q.v.d. per scolaras e scolars:

  • cun promoziun integrativa senza adattaziun da las finamiras da l‘instrucziun (pin s),
  • cun promoziun integrativa cun adattaziun da las finamiras da l’instrucziun (pin c),
  • cun mesiras pedagogic-terapeuticas (logopedia, terapia psicomotorica),
  • cun mesiras en cas d’in grond basegn da promoziun (audiopedagogia e mesiras en cas da donns da la vesida),
  • cun scolaziun speziala (integrativa u separativa),
  • cun mesiras pedagogicas en cas da talents extraordinaris.
  • Scolaras e scolars da lingua estra che vegnan scolarisads senza avair
    enconuschientschas da la lingua d'instrucziun survegnan l'emprim onn in rapport davart l'emprender empè d'in attestat da notas.

En il rapport d’emprender duai en spezial vegnir explitgà tge finamiras da l’instrucziun che la scolara u il scolar ha cuntanschì sco era schebain ella u el ha survegnì mesiras da la pedagogia speziala e sche gea, tgeninas.

En il sectur simpel po vegnir desistì da quest rapport davart l’emprender en l'emprim semester.

 

L’attestat po adina vegnir cumplettà d’in rapport davart l’emprender, en spezial er en cas da:

  • deficits en scola en consequenza d’absenzas pli lungas (malsogna etc.),
  • refusaziun d’ir a scola,
  • instrucziun privata,
  • u autras situaziuns spezialas (p.ex. scolaras e scolars ch’emprendan la lingua da scola sco segunda lingua).

 

Aspects formals e tematics dal rapport davart l’emprender èn d’unifitgar entaifer ina instituziun responsabla per la scola.