Navigation

Inhaltsbereich

  • Erste Mitteilung
  • Neuen Beitrag einfügen
"Cuminaivlamain per ina cultura da baiver cun responsabladad" è la devisa da la nova campagna da prevenziun cunter l'abus d'alcohol e per la promoziun da la sanadad, ch'è vegnida lantschada oz da l'uffizi da sanadad dal Grischun, da GastroGrischun e da hotelleriesuisse dal Grischun. Ella sa drizza a las collavuraturas ed als collavuraturs dals manaschis grischuns da gastronomia e d'hotellaria. En il center stat la toleranza nulla durant il temp da lavur.

La part centrala da la campagna è la distincziun "Genussbeiz.ch". Distinguids vegnan ils manaschis grischuns da gastronomia e d'hotellaria che coopereschan a la campagna e che s'occupan professiunalmain dal tema alcohol a la plazza da lavur. La pretensiun envers ils manaschis è la prescripziun da nulla promils durant il temp da lavur. Sut la devisa "Cuminaivlamain per ina cultura da baiver cun responsabladad" mettan ils manaschis participads in signal per in champ da lavur saun e productiv.

Consum d'alcohol a la plazza da lavur
Studis da l'uffizi federal da sanadad publica mussan che mintga tschintgavla persuna en Svizra consumescha "ristgadamain" alcohol, tranter auter er a la plazza da lavur. In consum d'alcohol abusiv chaschuna – ultra da donns da la sanadad – sin plaun naziunal perditas economicas da 3,4 milliardas francs per onn, quai pervia dad absenzas da curta vista, pervia d'ina prestaziun pli pitschna, pervia d'accidents e pervia da las malsognas consecutivas. Il motiv principal per il consum d'alcohol ristgà è savens il stress. Perquai na sa concentrescha la campagna betg mo al consum sco tal, mabain dat er tips per sa schluccar e per giudair il mintgadi ed infurmescha davart las purschidas da cussegliaziun dals posts spezialisads.
Cun passa 18 000 emploiadas ed emploiads en il Grischun ha la branscha da gastronomia e d'hotellaria ina grondezza ideala per la campagna. Durant ils onns suandants duai la campagna vegnir extendida er sin autras branschas.

Ulteriuras infurmaziuns ed annunzia sut www.genussbeiz.ch  

-
Motiv da la campagna da Genussbeiz.ch


Infurmaziuns:
Denise Rudin, uffizi da sanadad, manadra da partiziun "promoziun da la sanadad e prevenziun", vicemanadra dal program grischun cunter l'alcohol, tel. 081 257 64 02 u 078 746 42 20, e-mail: Denise.Rudin@san.gr.ch


Gremi: partiziun "promoziun da la sanadad e prevenziun"
Funtauna: rg uffizi da sanadad dal Grischun
Neuer Artikel