En la regiun da la Tumleastga e da la Mantogna viva ina ludra. Quai ha confermà il Laboratoire de Biologie de la Conservation de l'Université de Lausanne sin basa d'ina analisa genetica dals excrements chattads.

Emprimas supposiziuns da la populaziun hai dà la primavaira 2015. Da traplas fotograficas installadas sco er da girs da controlla regulars n'èn però resultadas naginas ulteriuras cumprovas. Ils 17 d'avrigl 2016 è però vegnì chattà in lieu cun excrements che conferma la preschientscha d'ina ludra. Danunder che quest animal deriva n'è betg enconuschent.

La ludra (lutra lutra) è morta ora en Svizra il tschientaner passà. Pervia da la derasaziun da populaziuns da l'ost (Steiermark, A) e vest (Savoia, F) dastg'ins ussa però partir dal fatg che ludras immigreschan puspè en Svizra en ina moda e maniera natirala. L'emprima cumprova nunspetgada d'ina ludra hai dà il december 2009 tar l'implant electric da La Punt/Rehanau. L'uffizi da chatscha e pestga ha constatà ina ludra en la stgala da peschs sin las registraziuns da video per survegliar las migraziuns dals peschs. Dapi il mars 2010 manca però mintga fastiz da quest animal solitari clandestin. Fin oz han pudì vegnir cumprovadas irreproschablamain sis ludras che vivan libramain en Svizra. Sin la pagina d'internet da la fundaziun Pro Lutra che accumpogna l'immigraziun natirala da la ludra en Svizra scientificamain e cun lavur da publicitad, èn las cumprovas marcadas sin ina charta (www.prolutra.ch).

Ludras vivan en moda solitaria ed occupan per lung da sistems d'auals colliads territoris d'ina lunghezza fin 40 kilometers. Lur pavel principal èn peschs, ellas maglian però er amfibis, reptils, mammals pitschens, utschels e giombers da flum sco er cadavers. Ellas èn en cas da mazzar utschels da la grondezza d'in irun grisch.

Nus essan fitg engraziaivels, sche eventualas observaziuns da ludras, sche fastizs e chats d'excrements vegnan annunziads al survegliader da pestga u al guardiaselvaschina cumpetent.

Fotografias agiuntadas

Ina ludra (© Gerhard Schulz)


Il lieu d'excrements d'ina ludra chattà ils 17 d'avrigl 2016 en la Tumleastga (© Marcel Züger, Pro Valladas)


Infurmaziuns:
- Hannes Jenny, uffizi da chatscha e pestga dal chantun Grischun, tel. 081 257 38 93, telefon mobil 079 504 30 90, e-mail: Hannes.Jenny@ajf.gr.ch
- Hans Schmid, president da la fundaziun Pro Lutra, tel. 044 254 25 22, telefon mobil 079 702 36 78, e-mail: hans.schmid@zoo.ch


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun