Il 1. da matg cumenza la stagiun principala da pestga en il Grischun. Tenor la lescha da pestga ston pestgadras e pestgaders che retiran ina patenta per ina stagiun u per in mais cumprovar d'avair las enconuschientschas necessarias per la pestga. In nov video da la chanzlia chantunala dal Grischun dat ina invista en ils curs da scolaziun per pestgadras e pestgaders giuvens e novs.

Quai ch'è obligatoric en il chantun Grischun dapi l'onn 2002, è vegnì introducì en l'entira Svizra il 1. da schaner 2009. Mintga pestgadra e pestgader che vul retrair en Svizra ina patenta per ina stagiun u per in mais, cumenza sia carriera da pestga cun ina scolaziun. Quai duai garantir ch'i dat ina pestga ecologica e confurma als basegns dals animals. Ensemen cun la federaziun chantunala da las pestgadras e dals pestgaders grischuns porscha l'uffizi da chatscha e pestga dal Grischun mintga onn circa 12 occurrenzas da scolaziun, en las qualas vegnan scolads fin 600 pestgadras e pestgaders giuvens e novs.

En il chantun Grischun èn per l'onn 2016 vegnids adattads ils curs per pestgadras e pestgaders giuvens e novs. L'entir curs dura da nov 2 dis è vegn organisà durant ina fin d'emna. Ils cuntegns dal curs èn plinavant vegnids cumplettads cun ils temas ecologia da las auas, enconuschientscha speziala dals peschs e protecziun dals animals. Questas adattaziuns sa basan sin las novas prescripziuns da l'organisaziun da tetg per la scolaziun da las pestgadras sportivas e dals pestgaders sportivs en Svizra. Las absolventas ed ils absolvents che han reussì la controlla da success survegnan la cumprova da las enconuschientschas da la materia "pestga", che als autorisescha d'ir a pestgar en l'entira Svizra ed en l'exteriur vischin.


Infurmaziuns:
Marcel Michel, biolog da peschs, uffizi da chatscha e pestga, tel. 081 257 38 94, e-mail: Marcel.Michel@ajf.gr.ch  


Gremi: uffizi da chatscha e pestga
Funtauna: uffizi da chatscha e pestga