Ina delegaziun dal parlament dal chantun Basilea-Champagna ha visità oz durant la sessiun d'avrigl 2016 il cussegl grond dal Grischun.

La delegaziun dad indesch persunas da Basilea-Champagna è vegnida manada dal president dal cussegl grond Franz Meyer. El è vegnì accumpagnà da la vicepresidenta Elisabeth Augstburger sco er da l'anteriura presidenta dal parlament Myrta Stohler.

Ils giasts da Basilea-Champagna èn vegnids beneventads dal president dal cussegl grond Vitus Dermont e dal vicepresident dal cussegl grond Michael Pfäffli. Ultra da quai han prendì part a l'inscunter ils presidents da las fracziuns dal Grischun. L'avantmezdi ha la delegaziun assistì a las tractativas currentas en l'edifizi dal cussegl grond. Suenter è in gentar cuminaivel stà sin il program. Il suentermezdi ha gì lieu ina visita guidada tras la citad veglia da Cuira ed ina visita da la catedrala.

La visita da la delegaziun ha servì al barat d'experientschas sco er a la tgira da las relaziuns amicablas. Questas scuntradas cun persunas directivas amias da parlaments chantunals han lieu ina fin duas giadas l'onn.

Fotografias agiuntadas:
Il president dal cussegl grond Vitus Dermont beneventa a Cuira il president dal parlament da Basilea-Champagna Franz Meyer (a dretga).

Las duas delegaziuns parlamentaras davant l'edifizi dal cussegl grond.


Gremi: chanzlia chantunala
Funtauna: rg chanzlia chantunala