Tar las preparativas per la stagiun da pestga tutga er la retratga da la patenta da pestga. Per pudair retrair la patenta per in onn u ina patenta mensila ston ins cumprovar ch'ins haja enconuschientschas da la pestga (attest obligatoric SaNa). Per quest intent vegnan purschids il mument en differents lieus dal chantun Grischun curs da scolaziun.

Tut las patentas pon vegnir cumpradas sco fin ussa tar il museum da la natira dal Grischun a Cuira (mardi fin sonda: 10.00-17.00) sco er tar la surveglianza da la pestga durant las uras da biro en contant resp. per assegn cun cartas da debit. Al spurtegl dal museum dalla natira dal Grischun resp. tar il survegliader da pestga datti la pussaivladad da pajar er cun cartas da debit sco MaestroCard u PostCard o cun cartas da credit sco MasterCard u Visa.

En il fegl uffizial dal chantun Grischun dals 7 da avril 2016 e sin la pagina d'internet da l'uffizi da chatscha e pestga www.jagd-fischerei.gr.ch èn publitgadas per ils singuls districts da pestga ils lieus, ils termins sco er las premissas per pudair retrair ina patenta. Sche terzas persunas vulan retrair patentas per persunas cun domicil en il chantun Grischun, ston ellas preschentar in attest da domicil persunal da questas persunas. Formulars correspundents pon vegnir chargiads giu da la pagina d'internet da l'uffizi da chatscha e pestga. En cas ch'ina persuna fa ina dumonda en scrit per retrair ina patenta, sto ella medemamain agiuntar in attest da domicil.

Buna pestga!


Gremi: uffizi da chatscha e pestga
Funtauna: rg uffizi da chatscha e pestga