La regenza ha prendì posiziun davart la consultaziun tar l'organisaziun da l'infrastructura da viafier (OIV). Ultra da quai ha ella approvà il project per ina halla da deposit per stalizzas da la vischnanca dad Arosa sco er la revisiun parziala da la planisaziun locala da Churwalden.
Consultaziun tar l'organisaziun da l'infrastructura da viafier (OIV)
La regenza grischuna sa participescha a la procedura da consultaziun da la confederaziun tar l'organisaziun da l'infrastructura da viafier (OIV). Ella suonda dal tuttafatg la posiziun da la conferenza dals directurs chantunals dal traffic public (CTP). Quest project duai tranter auter transferir il post actual per surdar ils trassés "Trasse Svizra SA" en in institut federal e rinforzar la cumissiun da cumpromiss concernent la viafier sco "RailCom" cun pussaivladads da sancziun.
En sia posiziun pretenda la CTP da coordinar meglier las differentas refurmas currentas pertutgant il traffic da viafier respectivamain pertutgant l'entir traffic public (traffic internaziunal, regiunal, local e traffic da rauba). Ella crititgescha cunzunt che aspects sco ils dretgs dals viagiaturs u las gestiuns da sistem en il sectur dal traffic n'hajan nagut da far cun l'infrastructura da viafier. Las midadas proponidas en quest reguard stoppian vegnir separadas dal project, perquai ch'ellas stoppian anc vegnir examinadas pli detagliadamain e na sajan anc betg prontas per la decisiun.
Posiziun da la conferenza dals directurs chantunals dal traffic public (CTP)
Surpigliada d'incumbensas d'execuziun en il sectur dal dretg veterinar, dal dretg da victualias e dal dretg davart las substanzas chemicas
La regenza ha approvà la cunvegna da dretg administrativ tranter il chantun Glaruna ed il chantun Grischun pertutgant la surpigliada d'incumbensas d'execuziun en il sectur dal dretg veterinar, dal dretg da victualias e dal dretg davart las substanzas chemicas. Uschia vegnan surdadas a l'uffizi per la segirezza da victualias e per la sanadad d'animals (USVA) per exempel incumbensas d'execuziun en il sectur da la protecziun dals animals e da las epidemias d'animals, ma er inspecziuns e controllas da products en il sectur da las victualias. Plinavant lavuran il veterinari sco er il chemicist dal chantun Grischun da nov er en il chantun Glaruna.
La regenza dal chantun Glaruna è vegnida incumbensada l'onn 2014 dal cumin da fusiunar il servetsch veterinar e la controlla da victualias en in'organisaziun cuminaivla analogamain a talas da la confederaziun e da la gronda part dals auters chantuns. Pervia da la grondezza dal chantun Glaruna è ina tala soluziun però mo raschunaivla en collavuraziun cun in auter chantun. Il cumin ha perquai autorisà la regenza glarunaisa da concluder ina cunvegna correspundenta cun in auter chantun.
Publicaziun da resultats da votaziuns e d'elecziuns
Tar la votaziun federala dal pievel dals 28 da favrer 2016 vegn la chanzlia chantunala a publitgar per l'emprima giada ils resultats detagliads dal chantun tenor regiuns e vischnancas. Las regiuns vegnan preschentadas en successiun alfabetica. Entaifer las singulas regiuns vegnan las vischnancas respectivas mintgamai ordinadas tenor l'alfabet. Questa structuraziun è la consequenza da las novas structuras chantunalas cun las regiuns sco nov plaun d'amez e cun l'aboliziun dals circuls sco corporaziuns territorialas. Questas novas structuras chantunalas èn entradas en vigur il 1. da schaner 2016. Fin ussa publitgava la chanzlia chantunala ils resultats detagliads davart las votaziuns e las elecziuns federalas e chantunalas tenor circuls e vischnancas.
Approvà ina halla da deposit per stalizzas da la vischnanca dad Arosa
La regenza dat la permissiun per il project d'ina halla da deposit per stalizzas da la vischnanca dad Arosa. Tenor il plan da zonas sa chatta il project da construcziun en il guaud. Perquai vegn il project approvà sco edifizi forestal en il guaud cun cundiziuns areguard la protecziun da la selvaschina cunter disturbis sco er areguard la protecziun da l'ambient.
La vischnanca dad Arosa maina mintgamai in stgaudament da stalizzas per proveder la basa tecnica ed il nov center da geriatria cun chalur. Per quests stgaudaments èn necessarias stalizzas sitgas che na dastgan betg vegnir depositadas en il liber. Per il stgaudament en il center da geriatria han stuì vegnir transportadas e furnidas l'enviern passà stalizzas da distanzas pli lungas, malgrà ch'i èn avant maun avunda stalizzas ad Arosa. La vischnanca vul perquai construir la halla da deposit ch'è planisada gia daditg.
La regenza ha approvà la revisiun parziala da la planisaziun locala da Churwalden
La revisiun parziala da la lescha da construcziun, concludida da la vischnanca da Churwalden ils 8 da settember 2015, vegn approvada da la regenza. Sco singuls meds da planisaziun èn vegnids approvads il plan da zonas 1:500 "Sporthotel Krone", il plan general da furmaziun 1:500 "Sporthotel Krone" sco er il plan general d'avertura 1:500 "Sporthotel Krone 2015".
L'impuls per la revisiun parziala ha dà la renovaziun planisada respectivamain l'engrondiment planisà da l'hotel Krone a Churwalden, il qual cumpiglia actualmain plirs edifizis. Per manar vinavant l'hotel en moda economica e moderna dovri ina rectificaziun areguard il manaschi ed ina modernisaziun cun engrondiment sco er ina renovaziun energetica. Per quest intent vegn l'areal midà da la zona d'abitar 3 en ina "zona per hotels Sporthotel Krone".
Visualisaziun da la renovaziun e da l'engrondiment da l'hotel Krone,
funtauna vischnanca da Churwalden
La revisiun parziala da la lescha davart l'organisaziun giudiziala entra en vigur
La revisiun parziala da la lescha davart l'organisaziun giudiziala (LOG) vegn messa en vigur per il 1. da schaner 2017. Exceptadas da quai èn la revisiun parziala da la lescha davart ils dretgs politics sco er la revisiun parziala da la lescha davart la giurisdicziun administrativa. Quellas vegnan messas en vigur retroactivamain per il 1. da favrer 2016.
La revisiun parziala da la lescha davart l'organisaziun giudiziala stat en connex cun la refurma dal territori. La giurisdicziun civila e penala vegn exequida en l'avegnir da las dretgiras regiunalas sco dretgiras chantunalas inferiuras. Ils circuls da dretgira per las dretgiras regiunalas n'èn betg pli ils districts, mabain las regiuns.
Gremi: regenza
Funtauna: rg chanzlia chantunala dal Grischun