En sia ultima sesida ha la regenza prendì posiziun tar la revisiun da la lescha federala davart il tribunal federal. Ultra da quai ha ella concedì contribuziuns per ils sistems directivs sustegnids da computers da la Viafier retica sco er dal Bus da la citad da Cuira SA ed ha approvà il project "Avertura Uaul Camischolas".
Gieus olimpics d'enviern Grischun 2026
La regenza ha prendì enconuschientscha da l'incumbensa da project al team central "Gieus olimpics d'enviern Grischun 2026". Qua tras fixescha l'uniun "Olimpia Grischun 2026" l'ulteriur proceder durant la fasa da project sco er l'incarica al team da project. Il team central sut l'egida dal manader da project Andreas Wieland elavura fin la fin d'avrigl en atgna responsabladad il concept tecnic. La regenza s'occupa durant la fasa da project actuala unicamain dals contacts externs cun auters chantuns, cun citads, cun vischnancas, cun la confederaziun e cun Swiss olympic. Suenter la furniziun dal project tecnic, che vegn a resguardar las directivas da Swiss olympic, decida la regenza davart l'ulteriur proceder. Quai en spezial er areguard il process da la furmaziun da l'opiniun politica. Tras questa incumbensa da project ha la repartiziun da las incumbensas tranter la regenza e las partidas ch'èn participadas a l'elavuraziun dal project pudì vegnir sclerida en l'interess da la chaussa cuminaivla ed a favur d'ina moda da lavurar effizienta.
Consultaziun tar la revisiun da la lescha federala davart il tribunal federal (LTF)
La regenza grischuna sa participescha a la procedura da consultaziun tar la revisiun da la lescha federala davart il tribunal federal. Il cussegl federal vul che dumondas giuridicas d'impurtanza fundamentala possian adina vegnir purtadas davant tribunal federal. Percunter duai la dretgira suprema vegnir distgargiada da cas main impurtants.
La regenza dal chantun Grischun beneventa da princip las finamiras dal project. En spezial beneventa ella la renunzia a las midadas tar la protecziun giuridica en il sectur dals dretgs politics. Sin fundament da la giurisdicziun la pli actuala dal tribunal federal è la via giudiziala sclerida en moda suffizienta, uschia ch'i na dat nagin basegn d'agir. Plinavant beneventa la regenza la scursanida dal termin da recurs en cas d'elecziuns e da votaziuns chantunalas sin 5 dis. Igl è impurtant ch'i saja en quest sectur svelt cler, sch'ina decisiun dal pievel vegn contestada u betg. Resalvas ha la regenza però en connex cun il catalog d'excepziuns areguard il dretg da submissiun ed areguard las concessiuns.
Contribuziuns chantunalas per infurmaziuns dinamicas per las passagieras ed ils passagiers en il traffic public
La regenza grischuna conceda contribuziuns chantunalas per sistems directivs sustegnids da computers dal Bus da la citad da Cuira SA e da la Viafier retica SA. Tras quai duain vegnir amplifitgadas las infurmaziuns dinamicas per las passagieras ed ils passagiers en il traffic public da persunas. Il Bus da la citad da Cuira SA survegn pia ina summa da 447 000 francs per remplazzar il sistem directiv sustegnì da computers. A la Viafier retica conceda la regenza ina contribuziun chantunala da 200 000 francs. La Viafier retica vuless metter a disposiziun en l'avegnir infurmaziuns en temp real davart la situaziun da traffic, e quai sin uraris en l'internet ed en applicaziuns mobilas.
Ils ultims onns è il tema da las infurmaziuns per las passagieras ed ils passagiers en il traffic public daventà anc pli impurtant. Pervia da las pussaivladads tecnicas e dal dumber creschent da smartphones èn las pretensiuns da la clientella s'agumentadas considerablamain. Ultra da quai eran pli baud las colliaziuns centralisadas en intgins puncts da la rait e pudevan vegnir survegliadas bain dal persunal. Oz ston vegnir garantidas colliaziuns en blers lieus entaifer la chadaina da transport. Pervia da la reducziun da persunal e pervia da l'automatisaziun da las staziuns na pon betg pli tuttas vegnir survegliadas a maun.
Ordinaziun da sanaziun per diversas ovras electricas grischunas
La regenza grischuna ha ordinà per pliras ovras electricas in'obligaziun da sanar l'accessibladad dals peschs. Pertutgadas èn quatter ovras da la Repower SA e duas da la San Murezzan energia. Tenor la lescha ston ils chantuns planisar mesiras tar ovras idraulicas existentas ed obligar las societads d'ovras electricas da realisar questas mesiras. En il chantun Grischun hai 153 obstachels en auas da peschs pervia d'ovras electricas, per 65 da quels è vegnì diagnostitgà in basegn da sanaziun.
Approvaziun dal project per l'avertura dal guaud Camischolas
La regenza approvescha il project "Avertura Uaul Camischolas" da la vischnanca da Tujetsch e conceda ina contribuziun chantunala da 288 100 francs. Tras la construcziun d'ina nova via da guaud d'ina lunghezza da 331 meters duai il guaud da protecziun survegnir in meglier access. Actualmain po el vegnir cultivà mo cun agid da helicopters.
Il guaud da protecziun Camischolas sa chatta da la vart sanestra da la Val Tujetsch ed è vegnì stgaffì per gronda part tras plantaziuns ils onns 1933 fin 1945. El protegia la via da l'Alpsu, la lingia da la Viafier Matterhorn-Gottard e territoris abitads cunter lavinas, bovas ed aua gronda. Ultra da quai ademplescha quest guaud er ina funcziun da niz impurtanta. Per garantir duraivlamain questas funcziuns dal guaud ston ils guauds vegnir tgirads e cultivads correspundentamain.
Gremi: regenza
Funtauna: rg chanzlia chantunala dal Grischun