Navigation

Inhaltsbereich

  • Erste Mitteilung
  • Neuen Beitrag einfügen
Las lavurs da construcziun per il sviament provisoric s'avanzan stupent. Uschia è la Val Calanca previsiblamain puspè accessibla a partir da gievgia saira.

Il termin exact da l'avertura dal sviament provisoric vegn communitgà sur www.strassen.gr.ch. Il sviament d'in vial vegn reglà cun amplas da traffic. Per garantir la segirezza da las participantas e dals participants dal traffic vegn il sviament avert per il traffic da transit per var dus dis en il tact d'ina ura durant las ulteriuras lavurs da siglientada e da rumida (07.00–12.00 e 13.00–18.00). Las uras d'avertura correspundentas vegnan signalisadas lunsch enturn e pon medemamain vegnir consultadas en l'internet.

Suenter l'avertura dal sviament provisoric pon – en ina segunda fasa – vegnir cumenzadas las lavurs da rumida e da reparaziun da la via da Calanca. La via chantunala è donnegiada fermamain tras la bova, uschia che questas lavurs duran previsiblamain anc almain dus mais.

Andament dals eveniments e da las mesiras:

7 da mars 2016
Curt avant las 19.00 vegn giu ina bova da ca. 5000 meters cubic tranter Molina d'Dent ed Arvigo. La bova rumpa or d'ina auta paraid crap, var 250 meters sur la via da Calanca. Passa 2000 meters cubic material sutterreschan cun in'autezza da fin 4 meters la via chantunala vers Arvigo e Rossa, e quai sin in lunghezza da bunamain 200 meters. L'access da Buseno è medemamain pertutgà da la bova. Per garantir che nagin n'entria en il territori periclità vegn la via chantunala serrada lunsch enturn.

8 da mars 2016
A bun'ura pon geologs da l'uffizi da construcziun bassa dal Grischun giuditgar la situaziun da privel actuala. Tenor quest giudicament n'exista pli nagin privel direct. Correspundentamain poi vegnir cumenzà cun las lavurs da construcziun per in sviament provisoric e cun las lavurs da rumida. Plinavant po vegnir avert l'access da Buseno sur la via chantunala veglia.

Stadi dals 9 da mars 2016

Las lavurs da construcziun s'avanzan bain. Per il sviament provisoric da la via da Calanca en il territori da la bova èsi – ultra da las lavurs da rumida – er necessari da siglientar crappuns pli gronds, da segirar las scarpas da la vart da la muntogna e da la val sco er da reparar la cuvrida da la via.

-
La via da Calanca e l'access da Buseno èn vegnids sutterrads da la bova.

-
Las lavurs da construcziun per il sviament provisoric s'avanzan bain.


Infurmaziuns:
Elia Lardi, responsabel per las medias, uffizi da construcziun bassa dal Grischun, tel. 081 257 37 10; e-mail elia.lardi@tba.gr.ch  


Gremi: uffizi da construcziun bassa
Funtauna: rg uffizi da construcziun bassa
Neuer Artikel